DILI, 05 juñu 2021 (TATOLI)—Komandu Polísia Nasionál Timor-Leste (PNTL) munisípiu Dili seidauk bele hatán akontesementu bala musan ne’ebé hakotu abitante na’in-rua (2) nia vida iha área Lahane, madrugada ohin.
Segundu Komandante PNTL Superintendente, Euclides Belo, lakohi hatán ho detallamente pergunta jornalista TATOLI-nian bainhira konfirma akontesementu ne’e, tanba ninia parte sei halo investigasaun kle’an, no sei informa liuhosi konferénsia imprensa.
Tuir dadus pre-liminár ne’ebé jornalista TATOLI halibur haktuir bala musan ne’ebé hamate Mateus de Deus “Amino”, no oan mane Camilio de Deus iha Ospitál Nasionál Guido Valadares (HNGV, sigla portugés) depois oras balun nia laran simu tratamentu hosi pesoál saúde maibé la konsege salva no vítima seluk ho kondisaun grave mak mane foun hosi família ne’e, mai hosi ajente membru seguransa.
Kazu ne’e akontese iha aldeia Ainitas-hun, suku Lahane, muninisípiu Dili, madrugada tuku 01.00, ohin.
Tuir dadus jornalista TATOLI, Amino mate ho bala musan hosi pistola Glock-19, tanba borus ba nia hirus matan, halo raan sai maka’as no nia oan mane Camilio kona iha kabun no mane foun ida kona iha ain ho kondisaun kanek grave.
Tuir informasaun ne’ebé Ajénsia Tatoli rekolla hosi sasin balun haktuir, kazu ne’e akontese tanba problema privadu ida mosu iha matebian nia rezidénsia, nune’e parte polísia ba atua, ikus mai mosu dezentendimentu ho ajente polísia ne’ebé suspeita ba akontesementu.
Akontesimentu ne’e halo parte família trauma no autoridade suku no joventude evakua kedas vitima na’in tolu ba HNGV hodi hala’o tratamentu intensivu, maibé ekipa médiku la konsege salva matebian Amino, tanba raan sai maka’as ona.
Dadaun ne’e mate isin vítima sira lori ona ba mortuáriu hodi hein transporta ba nia rezidénsia Lahane, no vitima ne’ebé kanek kontinua hala’o tratamentu.
Jornalista: Eugénio Pereira
Editór: Cancio Ximenes
