DILI, 07 juñu 2021 (TATOLI)—Governu liuhosi Ministériu Administrasaun Estatál (MAE) hahú ona implementa no konstrui “Uma Kbiit Laek” hamutuk 1.254 ba ema kbiit laek sira iha territóriu nasionál.
Diretora Sekretariadu Tékniku Programa Nasionál Dezenvolvimentu Suku (ST-PNDS), Claudina Soares Pinto, hateten hafoin Ministru Administrasaun Estatál (MAE), Miguel Perreira de Carvalho, hamutuk ho reprezentante Embaixadór Austrália, Carli Shillito, halo lansamentu primeira pedra ba implementasaun Uma Kbiit Laek (UKL) iha munisípiu Liquiça iha sesta (05/06) semana kotuk ne’e, Governu hahú ona implementa konstrusaun la inklui Rejiaun Administrativa Espesiál Oé-Cusse Ambeno (RAEOA).
Notísia Relevante: Governu lansa primeira pedra ba konstrusaun “Uma Kbiit Laek” iha Liquiça
“Hafoin lansamentu primeira pedra iha Aldeia Nunulete, Suku Maubaralisa, Postu Administrativu Maubara, Munisípiu Liquiça, Governu hahú ona implementa konstrusaun ‘Uma Kbiit Laek’ hamutuk 1.254 ba ema kbiit laek iha Timor-Leste. Entaun ita bele hateten kontrusaun iha Liquiça hahú ona no fulan haat mai bele finaliza no entrega ba benefisiáriu. Maibé, iha munisípiu seluk sei iha faze aprovizionamentu, bainhira faze aprovizionamentu hotu no lansa ona mak konserteza konstrusaun ne’e hahú, maibé ita garante katak tinan ne’e bele ramata,” Diretora PNDS ne’e hateten ba Agência TATOLI, iha nia knaar fatin Colmera, Dili, segunda ne’e.
Hosi dadus ne’e, benefisiáriu ba Uma Kbiit Laek iha Munisípiu Aileu sei konstrui uma 99, Ainaro 62, Baucau 177, Bobonaro 150, Covalima 90, Dili 24 de’it tanba Postu Administrativu Ataúro ho Metinaro mak hetan Uma Kbiit Laek ne’e, Ermera 156, Lautém 102, Liquiça 69, Manatuto 93, Manufahi 86 no Munisípiu Viqueque hamutuk 108.
“Dadus Ida-ne’e ba munisípiu 12 de’it. Maibé, ha’u hakarak hateten katak kada suku ida só aldeia ida de’it mak bele hetan Uma Kbiit Laek ne’e. Aldeia ida, ita identifika benefisiáriu na’in-tolu (3),” nia informa.
Aleinde ne’e, nia hateten, iha Rejiaun Administrativa Espesiál Oé-Cusse mak seidauk bele hahú halo konstrusaun “Uma Kbiit Laek” tanba pandemia COVID-19, maibé hafoin vasina ba doze daruak nian ekipa PNDS sei halo sensibilizasaun iha RAEOA.
“Agora ita hein de’it vasina doze daruak nian ne’e, bainhira hotu ami ba ona RAEOA hodi halo sensibilizasaun ba programa Uma Kbiit laek ne’e ba ita-nia autoridade sira. Depois Ida-ne’e hotu tama ba faze aprovizionamentu no lansa depois hahú konstrui uma, tanba iha RAEOA ne’e suku 18 de’it,” nia hatete.
Notísia Relevante: MAE seidauk identifika benefisiáriu “Uma Kbiit Laek” iha RAEOA
Jornalista: Osória Marques
Editór: Cancio Ximenes
