BAUCAU, 09 juñu 2021 (TATOLI)–Sekretáriu Konsellu Kombatente Libertasaun Nasionál (CCLN, sigla portugés), Manuel ‘Alari’ da Costa Soares, husu ba entidade hotu hanesan Sosiedade Sivíl, Parlamentu Nasionál (PN), no Igreja atu hamutuk kombate atitude amorál ne’ebé akontese iha Timor-Leste.
“Tempu to’o ona kombate hahalok a’at atu hanoin projeta jerasaun sira ba futuru ne’ebé di’ak liu,” Sekretáriu CCLN hateten ba Agência TATOLI, iha edifísiu CCLN, Villa antiga Baucau, kuarta ne’e.
Veteranu ne’e lamenta ho hahalok amorál ne’ebé akontese iha Baucau kontra regra igreja no kultura Timór.
Tuir ‘Alari’, Konsellu Kombatente rasik halo ona esforsu hodi ko’alia pur eskrita no orál ba Diosese tolu (Baucau, Dili no Maliana), no ba kestaun ne’e parte igreja suporta no prontu apoia esforsu veteranu luta kontra atetude amorál.
“Hahú hosi Prezidente CCLN Baucau no estrutura tomak lamenta tebes ho hahalok amorál ne’ebé publika liuhosi rede sosiál iha loron hirak liubá no sai konsumu públiku,” nia akresenta.
Veteranu ne’e dehan, Konsellu la kestiona privasidade, maibé atitude amorál ne’ebé publika bainhira ema hotu haree, fó imajen ladi’ak.
Tuir nia, uluk veteranu sira luta ba ukun-an tanba kontra hahalok amorál, nune’e bainhira daudaun ne’e akontese, sira prontu hamrik atu akumula forsa hotu no sei la hakiduk kombate hahalok ne’ebé akontese la’ós de’it iha Baucau maibé territóriu tomak.
“Ami dehan la hakiduk, tanba hau-nia Prezidente firme, maski lakon vida joven tanba pasa iha ai-laran to’o katuas mak foin tun mai villa, maibé iha matan no fuan katak buat ne’e la’ós baibain, tanba luta iha ai-laran kontra hahalok a’at ne’e,” Alari afirma.
Aleinde igreja, veteranu sira hato’o ona karta ba Sosiedade Sivíl liuhosi Fórum Organizasaun Naun Governamental Timor-Leste (FONGTIL), inklui kada bankada partidu polítiku iha asentu Parlamentu Nasionál, inklui ezijénsia atu kria lei forte hodi kombate hahalok amorál iha Timor-Leste.
Antes ne’e, munisípiu Baucau sai debate públiku relasiona ho publikasaun vídeo ‘Agaza Baucau’ ne’ebé espalla iha rede sosiál.
Jornalista: Natalino Belo
Editora: Julia Chatarina
