BAUCAU, 09 juñu 2021 (TATOLI)—Tribunál Distritál Baucau (TDB), iha tinan 2021 nia laran, rejista númeru kazu krime hamutuk 259 no sivíl iha kazu 43, ho totál kazu 302.
Tuir Juiza Administradora TDB, Jumiaty Maria Freitas, hosi kazu krime no sivíl ne’ebé rejista, la signifika númeru kazu sivíl la sa’e, maibé tamba prosesu tramitasaun mak han tempu kompara ho krime.
“Atu kompara de’it, kazu sivíl mós a’as hotu, maibé nia númeru kompara ho krime a’as liu sivíl,” Juiza Administradora TDB, hateten iha TDB, Villa nova Baucau, kuarta ne’e.
Notísia relevante: Julgamentu iha TDB la’o normál durante implementasaun Serka Sanitária
Nia esplika, kona-ba prosesu kazu krime nia tramitasaun, juís apresia de’it akuzasaun hodi marka no halo julgamentu, enkuantu kuandu kazu kiik loron ida, maibé kazu komplexu bele fulan ida, kazu baibain bele la to’o semana ida finaliza ona, no halo sentesa durante loron 15.
Enkuantu, kazu sivíl diferente, tanba trasmitasaun han tempu no bainhira prosesu ida tama tenki apresia no halo aprovizionamentu hafoin sitasaun, tentativa konsiderasaun, no parte sira halo testamuña mak foin halo julgamentu.
Hosi kazu krime rasik, TDB rejista kazu violénsia doméstika no arma branka mak sa’e maka’as.
“Iha Baucau rasik, kazu ne’ebé a’as liu maka violénsia doméstika, ne’e la’ós iha área Baucau de’it maibé kauze área juridisaun haat ne’e hotu ho arma branka,” nia hatutan.
TDB rasik nafatin marka oráriu kada loron halo prosesu julgamentu, tuir kondisaun durante implentasaun Serka Sanitária iha munisípiu Baucau.
Jornalista: Natalino Belo
Editora: Julia Chatarina
