BOBONARO, 10 juñu 2021 (TATOLI)—Serbisu Diresaun Seguransa Sosiál (SDSS), munisípiu Bobonaro, rejista tan ema na’in 300 nu’udár benefisiáriu ba subsídiu idozu no inválides.
“Dadus ne’e ita haruka ona ba nasionál. Dadus ne’e ba tinan ida ne’e nian,” Koordenadór SDSS Munisípiu Bobonaro, Acásio Gonçalves hateten ba jornalista Agência Tatoli iha serbisu fatin, Raifun Maliana, kinta ne’e.
Notísia relevante:INSS submete dadus idozu 94.000 ba BNCTL atu prodús ATM
Koordenadór ne’e esplika, iha ema barak mak seidauk bele hetan sira-nia direitu, tanba dokumentu balun la kompletu, nune’e ekipa tenke haruka fila-fali ba suku atu hadi’a hafoin bele submete ba nasionál.
“Husu ba inan-aman sira labele triste tanba imi sei hetan oportunidade no ida-ne’e imi-nia direitu atu hetan,” nia enkoraja.
Tuir dadus, iha munisípiu Bobonaro, hahú hosi 2017 to’o 2020, iha ema na’in 9.331 mai hosi postu administrativu Maliana, Balibo, Atabae, Cailaco, Bobonaro no Lolotoe mak sai ona benefisiáriu ba subsídiu ne’e.
Programa Governu liu hosi Ministériu Solidariedade Sosiál fó subsídiu ba idozu-sira kada fulan ema ida hetan $30 no pagamentu kada fulan ne’en ho montante $180 liuhosi Banku Nasionál Komérsiu Timor Leste (BNCTL sígla portugés).
Kona-bá mekanizmu pagamentu, Koordenadór ne’e esplika, parte BNCTL mak prepara kondisaun no Institutu Nasionál Seguransa Sosiál (INSS) mak halo monitorizasaun ba sistema.
Jornalista: Sérgio da Cruz
Editór: Cipriano Colo
