BAUCAU, 11 juñu 2021 (TATOLI)–Diretór Servisu Sentru Solidariedade Sosiál Munisípiu Baucau (CCCMB, sigla portugés), Guido Ricardo Belo, hateten, maski implentasaun Serka Sanitária, maibé atendimentu ba benefisiáriu sira kontinua la’o normál.
“Ami iha ne’e karik benefisiáriu presiza atende sira-nia prekupasaun, sira ne’ebé mosu ami nafatin la’o,” Diretór informa, iha ninia knaar fatin, Villa nova, Baucau sesta ne’e.
Notísia relevante: Governu kontinua renova Serka Sanitária iha Baucau no hakotu Viqueque
Maski nune’e, Dirijente sira deside fó toleránsia ba funsionáriu sira ho idade 50 ba leten, atu serbisu hosi uma tanba konsidera iha risku ba saúde, maibé funsionáriu sira ne’ebé iha forsa fíziku sufisiente, nafatin halo atendimentu hanesan baibain.
“Tamba fatin luan, sira mai nafatin no aplika rotasaun, maibé balun hakarak mai serbisu tamba iha kestaun esensiál lubun ida no la aplika rotasaun, tamba idozu, ema ho defisiente ne’ebé lorloron iha ne’e, entaun presiza atende,” nia akresenta.
Totál funsionáriu iha CCCMB rasik pur volta permanente 29, kontratadu 10, ho totál funsionáriu 39, ne’ebé na’in-rua mak ho idade tinan 50 liu.
CCCMB iha unidade lima hanesan protesaun labarik no feto, seguransa sosiál, promosaun no protesaun ba ema ho defisiente, asisténsia sosiál inklui admistrasaun no rekursu umanu.
Jornalista: Natalino Belo
Editora: Julia Chatarina
