BOBONARO, 11 juñu 2021 (TATOLI)—Dezde implementasaun Programa Nasionál Dezenvolvimentu Suku (PNDS) iha 2013 to’o oras-ne’e, konsege ezekuta projetu hamutuk 2.000-resin no setór Água ho Saneamentu mak rejistadu aas liu ho 75% iha territóriu tomak.
“Iha 75% ona, hahú hosi 2013 ita konsege konstrui projetu 2.000-resin no tinan ida-ne’e ita konklui tan bele atinje 3.000,” Diretora Jerál, PNDS, Claudina Soares Pinto, hateten iha serimónia inaugurasaun sistema gravitasaun be’e moos iha aldeia Fatululik, Suku Balibo Villa, postu administrativu Balibo, munisípiu Bobonaro, sesta ne’e.
Notísia relevante:Governu hahú konstrui uma kbiit laek iha Bobonaro
Claudina Soares Pinto ne’e, esplika durante PNDS foka makaas ba setór Bee no Saneamentu ho nia persentajen boot liu tanba problema ne’ebé komunidade aprezenta maioria falta bee-moos.
Alende ne’e iha setór agrikultura, saúde no edukasaun mós sai problema prioridade komunidade nian, maibé iha alokasaun orsamentu hosi sekretariadu PNDS, setór bee no Saneamentu sempre sai programa primeiru ne’ebé sempre deside hosi komunidade.
Tuir menu indikativu PNDS iha setór lima mak hanesan, bee no saneamentu, agrikultura, edukasaun, saude no infraestrutura estrada rurál, hosi item hirak-ne’e tama iha pakote orsamentu ida.
Planu ne’ebe PNDS sei implementa, halo projetu iha suku 245 ho orsamentu ne’ebe apoia hosi Governu Austrália iha 4 juñu hamutuk milaun $10.5 sei implementa millaun $7 resin no orsamentu ne’ebé Governu prevee ba PNDS.
Inaugurasaun sistema bee moos iha Balibo
Iha okaziaun ne’e Diretór Jerál Dezenvolvimentu Rurál, Rosito Guterres inaugura sistema gravitasaun be’e moos iha aldeia Fatululik, Suku Balibo Vila, Postu Administrativu Balibo, Munisípiu Bobonaro.
Programa rezilénsia komunitária no rekoperasaun ekonómika ne’e, implementa tanba hetan Fundus hosi Parseiru Governu Austrália iha tinan kotuk ho montante alokasaun ba Suku Balibo Villa hamutuk $29.431,93, hodi konstrui liu hosi PNDS.
Rosito Guterres hateten, Governu sei kontinua apoia komunidade hodi hadi’a infraestrutura suku no Bee moos ba komunidade.
Inaugurasaun ba sistema gravitasaun bee-moos ne’e hanesan kontinuasaun ba programa faze dahuluk ne’ebe PNDS realiza ona iha tinan kotuk.
Kanalizasaun bee moos ne’e liga hosi bee-matan luli, kuaze kilomentru tolu hosi tanki rezervatóriu, ne’ebé kompleta ho tornera públiku lima, sei benifisia populasaun uma-ka’in 90, iha bairru Fatukakae ho Lulimatan.
Jornalista: Sérgio da Cruz
Editór: Cipriano Colo
