Profesór balun reklama ba PN tanba seidauk simu pagamentu retroativu

DILI, 21 juñu 2021 (TATOLI)—Profesór balun hato’o keixa ba reprezentante povu iha uma fukun Parlamentu Nasionál tanba seidauk simu pagamentu retroativu hosi Ministériu Edukasaun, Juventude no Desportu (MEJD).
Deputadu bankada Partidu Libertasaun Populár (PLP), Noé da Silva Ximenes “Buka-Tuir”, levanta kestaun ne’e tanba profesór balun reklama katak to’o ohin loron seidauk simu sira-nia orsamentu ba retroativu ninian.

“Ha’u lahatene, prosesu to’o iha-ne’ebé mak difikulta ita-nia sidadaun sira. Tanba, tuir buat ne’ebé mak ministériu sira fó mai ami katak ema hirak ne’e hetan hotu ona sira-nia direitu, maibé informasaun tama nafatin katak balun seidauk simu pagamentu retroativu ne’e,” Deputadu Noé levanta liuhosi plenária, segunda ne’e.
Nia husu Governu liu-liu Ministériu Edukasaun, Juventude no Desportu (MEJD) atu esklarese informasaun ne’e, nune’e profesór sira iha intendimentu.
Hatán ba preokupasaun ne’e, Ministru ba Asuntu Parlamentár no Komunikasaun Sosiál (MAPKOMS), Francisco Jerónimo sei relata informasaun ne’e ba MEJD hodi buka solusaun.
Antes ne’e Governu liuhusi Ministériu Edukasaun, Juventude no Desportu (MEJD) sei selu profesór retroativu rejime espesiál hosi rejime tranzitóriu hamutuk na’in-4.702.
Bainhira profesór sira ne’e tama ona rejime espesiál, iha tan rejime seluk ne’ebé hateten katak bainhira profesór ida hetan nia avaliasaun dezempeñu ‘Muito Bom’ tinan rua, nia mós iha aumentu ba nia saláriu.
Notísia Relevante: Governu Sei Selu Profesór Retroativu Rejime Espesiál 4.702
Jornalista : Evaristo Soares Martins
Editór : Cancio Ximenes

