DILI, 23 juñu 2021 (TATOLI)–Governu liuhosi reuniaun Konsellu Ministru, iha kuarta ne’e, hahú prepara kondisaun liuhosi aprova estratejia integrada ba implementasaun Sistema Identifikasaun Únika ka ID Únika ne’ebé aprezenta hosi Ministru Prezidénsia Konsellu Ministru, Fidelis Manuel Leite Magalhães.
“Ita aprova estratejia ne’ebé inklui planu operasionál no projetu orsamentu ezekusaun, ne’ebé sei submete ba fundu infraestrutura ba finansiamentu. Fó orientasaun atu prosede kria Unidade Misaun implementasaun Identifikasaun Únika , ne’ebé prevee iha estratejia, nune’e Komisaun Téknika Eventuál mantein ninia funsionamentu hodi garante implementasaun ne’ebé delibera ona to’o instalasaun Unidade Misaun ne’e,” Ministru relata hafoin reuniaun ezekutivu, iha Palásiu Governu.
Notísia relevante: Rejistu dahuluk sistema Identifikasaun Únika sei realiza iha tinan 2022
ID úniku sei estabelese identidade dijitál bazeia ba konjuntu mínimu dadus, ne’ebé inklui númeru aleatóriu ida, dadus biográfiku sira no informasaun biométrika.
Sistema ne’e permite sidadaun no rezidente sira iha asesu ba servisu públiku no privadu lubuk ida.
Nune’e mós, sei ajuda setór privadu no Governu atu hamenus fraude no identidade falsa sira no ko’a kustu tranzasaun ba verifikasaun identidade.
“Estratejia ne’e sei implementa entre tinan 2021 no 2025, ne’ebé hakarak atu rejista ema millaun ida no vinkula identidade dijitál ba setór bankáriu no telekomunikasaun, ba rejistu sivíl, ba rejistu eleitór, saúde no edukasaun, ba rejistu empreza no banku dadus funsionál importante sira balun,” nia haktuir.
Estratejia no planu operasionál dezenvolve ona internamente hosi Governu, liuhosi prosesu konsultivu ida hosi Komisaun Téknika ne’ebé lidera hosi Prezidénsia Konsellu Ministru Ministériu Justisa no TIC Timor.
Preparasaun ne’e partisipa diretamente hosi Ministériu Saúde, Ministériu Edukasaun, Juventude no Desportu, Ministériu Finansa, Ministériu Interiór, Ministériu Administrasaun Estatál, Ministériu Solidariedade, Sosiál no Inkluzaun Sosiál no Komisaun Funsaun Públika.
Jornalista : Antónia Gusmão
Editora : Julia Chatarina
