2020, membru PNTL 72 hetan formasaun kona-bá direitu umanu

DILI, 25 juñu 2021 (TATOLI)—Durante tinan 2020, membru Polísia Nasionál Timor-Leste (PNTL) hamutuk 72, hetan ona formasaun kona-bá direitu umanu hosi Provedoria Direitu Umanu no Justisa (PDHJ sílga portugés).
Tuir relatóriu anuál PDHJ 2020 ne’ebé hato’o ba Parlamentu Nasionál (PN), katak, PDHJ halo kooperasaun ho PNTL liuhosi asinatura nota entedimentu ho Sentru Formasaun Polísia (CFP sígla portugés) iha tinan 2014 no renovasaun iha tinan 2019.
Notísia relevante:PDHJ Bobonaro simu keixa violasaun direitu umanu sia
Kooperasaun ne’e ho objetivu atu dezenvolve no fó kapasitasaun ba instituisaun liuhosi programa no atividade-sira hanesan semináriu, workshop, diseminasaun nomós atividade seluk ne’ebé ho natureza promove koñesimentu membru PNTL iha área direitu umanu.
Formasaun ne’e PDHJ hamutuk ho parseiru-sira PNTL ho UADU-ONU iha Timor-Leste realiza iha munisípiu Ainaro, Aileu no Liquica.
“Importánsia hosi formasaun ne’e hodi haforsa koñesimentu membru-sira kona-bá asuntu direitu umanu, espesifikamente relasiona ho respeita no protesaun ba direitu umanu iha territóriu,’’ Provedora, Jesuina Maria Ferreira Gomes, hateten iha relatóriu anuál ne’ebé Agência Tatoli asesu, iha sesta ne’e.
PDHJ halo avaliasaun ba partisipante-sira molok no hafoin treinamentu, avaliasaun ba partisipante-sira liuhosi pré-test no post-test.
Rezultadu avaliasaun hatudu katak, membru PNTL ne’ebé tuir formasaun iha aumentu koñesimentu kona-bá direitu umanu.
Liuhosi pre-test hatudu 53% no depois de treinamentu post test hatudu 76,1 %, signifika membru PNTL formandu sira-nia koñesimentu kona-bá direitu umanu aumenta depois de formasaun.
PDHJ mós realiza ona treinamentu kona-bá direitu umanu ba membru FALINTIL Forsa Defeza Timor Leste (F-FDTL) na’in 70, feto na’in-neen ho mane 64, nune’e hosi 2017-2020, formandu akumuladu hamutuk 267, kompostu hosi feto 28 no mane 239.
Jornalista: Nelson de Sousa
Editór: Cipriano Colo

