BOBONARO, 05 jullu 2021 (TATOLI)—Kondisaun estraga liga hosi suku Oe-leu, postu administrativu Bobonaro ba postu administrativu Lolotoe munisípiu Bobonaro, besik atu kotu kauza hosi dezastre naturál ne’ebé akontese iha fulan abríl.
Xefe suku Oe-leu, Januário Meta-tae Bragança, husu Governu liuliu Ministériu Obra Públika (MOP), atu tau atensaun ba situasaun ne’e molok estrada ne’e kotu, bele impede movimentu komunidade atu lori sira-nia produtu ba merkadu.
Notísia relevante:PNDS implementa ona projetu 180 iha Bobonaro
“Agora movimentu transporte susar tebes tanba dalan besik kotu ona. La kleur udan monu-rai bele kotu ona. Tanba ne’e, se bele Governu ajuda hadi’a ona,” Januário Meta-tae Bragança, hateten ba jornalista Agência Tatoli, via telefónika segunda ne’e.
Antes ne’e Autoridade lokál hamutuk ho komunidade ho volutariamente lalin fatuk no kee rai hodi taka, no konsege fasilita movimentu transporte públiku, maibé situasaun ne’e sei aguenta de’it to’o tempu udan.
Motorista, Augusto Barreto, hateten kondisaun estrada ne’e difikulta tebes sira atu ultrapasa tanba rai monu halo rai naruk, no hela deit mak dalan ba medida karreta-nian, no situasaun ne’e halo motorista sira mós trauma bainhira tula pasajeiru ka sasan barak.
Populasaun suku tolu iha postu administrativu Bobonaro mak asesu ba estrada ne’e, mak hanesan Oe-leu, Tapo ho Leber no populasaun postu administrativu Lolotoe tomak, inklui komunidade hosi munisípiu Covalima.
Estrada ne’e konstrui hosi kompaña nasionál Marabia Unipesoal Lda, iha 2010 no entrega ba Governu iha 2016.
Jornalista: Sérgio da Cruz
Editór: Cipriano Colo
