BOBONARO, 05 jullu 2021 (TATOLI)—Komandante Polísia Nasionál Timor-Leste (PNTL), munisípiu Bobonaro, Superintendente, Antoninho Mau-Luta, sei uza kompeténsia hodi halo re-estruturasaun ba komandante eskuadra-sira inklui komandante seksaun-sira.
“Ha’u sei halo re-estruturasaun jerál, inklui iha komandu laran tanba lei fó dalan. Maibé, ha’u sei konvoka enkontru jerál, atu halo avaliasaun ba hotu-hotu nia serbisu depois mak ita prepara atu koloka komandante-sira tuir ida-idak nia-kapasidade,” Antoninho Mau-Luta, hateten ba jornalista-sira iha knaar fatin, segunda ne’e.
Notísia relevante:António Mauluta Sei Estuda Regulamentu Dixiplinár PNTL
Komandante foun ne’e mós sei uza kompeténsia atu halo planu ba seguransa, loke prosesu dixiplinár ba membru-sira ne’ebé kontra órden no halo mudansa ba membru-sira inklui komandante eskuadra-sira.
Mau-Luta mós haruka ona lista komandante eskuadra Lolotoe, adjuntu komandante eskuadra Cailaco no membru Ofisiál Polísia Suku (OPS) ba Komandante Jerál PNTL, tanba durante ne’e fatin hirak ne’e Seidauk koloka inklui suku tolu seidauk koloka OPS.
“Lei fó dalan no ha’u bele halo proposta, komesa ohin ha’u haruka ba Komandante Jerál,” nia informa.
Tuir planu, sei re-estrutura mós membru Konsellu Polisiamentu Komunitária (KPK), instala tan membru KPK iha suku-sira atu serbisu hamutuk ho autoridade lokál-sira iha Bobonaro laran tomak, nune’e bele garante seguransa iha nível munisípiu to’o aldeia.
Antoninho Mau-Luta simu pose hosi Komandante Jerál PNTL, Faustino da Costa, nu’udár Komandante munisípiu Bobonaro, iha 01 jullu tinan ne’e, no antes ne’e halo’o knaar nu’udár segundu komandante munisípiu Bobonaro.
Jornalista: Sérgio da Cruz
Editór: Cipriano Colo
