BOBONARO, 08 jullu 2021 (TATOLI)—Implementasaun programa Life Skill Basic Education (LSBE) no emprendorizmu, motiva, dezenvolve no promove talenta joventude munisípiu Bobonaro, iha área oi-oin.
“Ho implementasaun programa LSBE, lori progresu boot ba joven-sira tanba redús ona númeru ne’ebé antes ne’e barak tuur de’it iha dalan ninin. Programa ne’e hamosu ona joven ne’ebé kria kampu traballu an rasik. Sira hatudu talent oinoin,” Diretór Sentru Joventude Munisípiu Bobonaro, Alcino Lopes, hateten ba jornalista Agênsia Tatoli, iha kna’ar-fatin,Holsa Maliana, kinta ne’e.
Notísia relevante:Bobonaro hein desizaun MEJD implementa ensinu aprendizazen
Programa LSBE fó formasaun kona-bá edukasaun sívika, Informasaun Teknolojia (IT), Saúde reporodutiva, kursu Ingées no portugés, atu promove talentu no kreatividade ne’ebé durante ne’e subar hela no joven barak mak partisipa.
Mekanizmu formasaun ne’e, ekipa identifika uluk fatin risku ba konflitu iha suku-sira, hafoin fahe informasaun diretamente ba joven-sira liuhosi média sosiál facebook, WatshApp no fó treinamentu iha Sentru.
Tuir planu, programa ne’e sei implementa mós ba estudante-sira iha Eskola Pre Sekundária no Sekundária iha munisípiu Bobonaro, kona-bá utilizasaun Internet Saudável, bianhira Governu reativa eskola normál.
Tuir observasaun hosi Sentru Joventude ne’e katak, partisipasaun joven sira iha programa ne’e másimu, maibé ekipamentu ba formasaun iha área balun mak la sufisiente.
Tan ne’e, ba futuru Sentru Joventude Munisípiu Bobonaro sei prepara kondisaun atu bele halibur joven sira ne’ebé hakarak espresa talentu iha área Arte no Múzika.
Sentru formasaun ne’e mós prepara ona planu atu ba fó formasaun ba joven-sira iha postu administrativu Lolotoe no Atabae, tanba tuir informsaun iha área remota-sira joven barak mak moe atu espresa sira-nia talent no susar atu asesu ba kampu traballu.
Maski la temi montante, maibé Alcino Lopes, hateten Governu liuhosi Sekretáriu Estadu Joventude no Desportu (SEJD), aloka orsamentu bazeia ba Programa ne’ebé implementa.
Jornalista: Sérgio da Cruz
Editór: Cipriano Colo
