AINARO, 09 jullu 2021 (TATOLI)–Sekretáriu Estadu Kooperativa (SEKoop), Elizário Ferreira, enserra distribuisaun Cesta Básika iha munisípiu Ainaro, ne’ebé hahú implementa iha novembru 2020 no ramata iha jullu 2021.
Iha biban ne’e, Sekretáriu Estadu apresia kooperasaun di’ak hosi parte autoridade lokál, komunidade, kompañia distributór, inklui autoridade seguransa durante prosesu distribuisaun hodi atividade ne’e bele la’o ho susesu.
“Autoridade sira akompaña no ajuda tebes, iha parte Polísia Nasionál Timor-Leste (PNTL), administrasaun no autoridade nível suku no aldeia. Obrigadu ba ita-boot sira-nia kolaborasaun hodi fó susesu distribuisaun Cesta Básika,” governante halo intervensaun durante seremónia enserramentu, iha salaun administrasau, sesta ne’e.
Iha okasizaun enserramentu, SEKoop distribui sertifikadu ba autoridade lokál munisípiu Ainaro nu’udar jestu valorizasaun ba kolaborasaun hodi fó susesu ba peograma Governu
SEKoop hanesan responsável ba implementasaun Cesta Bázika iha munisípiu Covalima, Liquiçá, Lautém, Ainaro, Aileu, Manufahi no Manatuto, iha suku 183, postu administrativu 33.
Enkuantu pagamentu ba kompañia ne’ebé partisipa iha distribuisaun ne’e la’o daudaun.
Notisia relevante: MF halo pagamentu Cesta Bázika faze daruak millaun $13,6
Tuir Sekretáriu Estadu, maski durante distribuisaun hetan difuldade, maibé parte SEKoop hamutuk ho kompañia fornesidór konsege rezolve no buat hotu la’o diak.
Iha fatin hanesan, Pontu fokál apoia Cesta Bázika munisípiu Ainaro, Manuel Ramos Pinto, informa, rejiaun ne’e kompostu hosi populasaun 88.000 hosi família 15.603, ne’ebé hosi totál ne’e, ema hamutuk 86.569 mak simu ona Cesta Bázika.
Nune’e mós, Diretór kompañia Maristi, Afonso Barreto, nu’udar fornesidór, husu ba Governu atu kontinua programa ne’e tanba bele motiva agrikultór prodús liután.
Nia parte agradese mós ba Governu liuhosi SEKoop, ne’ebé fó ona konfiansa hodi partisipa iha programa kurtu prazu iha ámbitu rekuperasaun ekonómika.
“Ha’u hato’o obrigadu barak ba Sekretaria Estadu Kooperativa no autoridade seguransa ne’ebé koopera di’ak tebes durante atividade la’o,” nia dehan.
Jornalista : Natalino Costa
Editora : Julia Chatarina
