DILI, 16 jullu 2021 (TATOLI)-Centro Nasionál Chega (CNC), sesta ne’e, selebra aniversáriu ezisténsia CNC nian ba dala-IV ho tema “Memoriálizasaun Dalan ba Dignifika Sobrevivente”.
Diretór Ezekutivu CNC, Hugo Maria Fernandes, esplika objetivu hosi tema ne’e CNC hili “Memoriálizasaun Dalan ba Dignifika Sobrevivente” tanba tema ne’e mai hosi reflesaun ida durante tinan haat servisu CNC nian, katak hafoin iha 2017 mai to’o 2021 liuhosi inisiativa barak ne’ebé halo ikus nota katak apoiu ba vítima sira hosi violasaun direitu umanu pasadu nian, seidauk barak.
“Ami foti tema ne’e tanba iha CNC rasik introdús inisiativa balu akompaña katak, liña ministeriál barak mak seidauk integra didi’ak, ba programa ida apoiu ba vítima violasaun direitu umanu ne’e ho didi’ak, no aleinde ida ne’e reflesaun ida mós progresu ne’ebé CNC atinje daudaun hanesan, iha kooperasaun di’ak ho Ministériu Solidariedade Sosiál no Inkluzaun (MSSI), Ministériu Justisa, Ministériu Edukasaun Juventude no Desportu (MEJD), Ministériu Ensinu Superiór Siénsia no Kultura, sira ne’e hotu fó esperansa katak dalan ida ne’ebé mak di’ak atu fó apoiu barak liután ba vítima sira tinan haat mai,” Hugo Maria Fernandes, esplika ba Agência Tatoli iha nia knaar fatin, Balide, Dili.
Nia hatutan, atu apoiu ba vítima violasaun direitu umanu pasadu presiza liña ministeriál ne’ebé integra atu apoiu ba vítima sira mak dezde tinan 2018 estabelese tiha ona grupu ida traballu ba solidariedade ba sobrevivente, entaun ministériu sira ne’ebé presiza tama iha grupu ne’e mak hanesan MSSI, Ministériu Saúde, Ministériu Justisa, Ministériu Negósiu Estranjeiru no Kooperasaun (MNEK), no Sekretáriu Estadu Inkluzaun Sosiál, inklui mós organizasaun sosiedade sivíl sira.
Maibé grupu ne’e la’o mai iha 2020, ida mak partikularmente integra rezultadu hosi grupu Traballu ne’e ba iha ninia polítika hanesan MSSI ne’ebé mak hahú hosi 2020 mai to’o 2021 aloka orsamentu $160.000 hodi apoiu ba sobrevivente sira liuhosi programa reparasaun nian maibé sira-nia apoiu ne’e hahú hosi 2018-2019 sira mós apoiu ba CNC no organizasaun sosiedade sivíl ba servisu sira hanesan reunifikasaun ba família.
“Ami iha prosesu atu hetan parseria ne’ebé mak di’ak liu ho ministériu rua hanesan MNEK no Ministériu Saúde (MS) tanba hein katak iha tinan ne’e, ministériu rua ne’e bele partisipa ativamente no mós hahú inklui ona programa balu hodi tulun maluk sobrevivente sira, iha sira-nia polítika ministériu nian, Ministériu Saúde iha nota entendimentu ne’ebé ami diskute ne’e oinsá mak MS bele fó apoiu ba tratamentu saúde ba sobrevivente sira, no MNEK liuliu atu bele mobiliza rekursu umanu sira hosi organizasaun internasionál nasaun li’ur ne’ebé mak durante tempu okupasaun Indonézia sira mós involve konflitu iha Timor-Leste,” nia hateten.
Munisípiu rua ne’e mak tama tan mai Grupu Traballu CNC nian, fiar katak apoiu no esforsu sira ne’ebé atu fó apoiu ba sobrevivente sira iha efeitu di’ak liután.
Selebrasaun ba aniversáriu CNC nian tinan ida ne’e sei realiza atividade kolókiu nasionál reparasaun ba vítima 1975-1999 hodi komemora loron ezisténsia CNC nian tanba Centro Nacional Chega, Institutu Públiku ida ne’ebé estabelese ho dekretu lei númeru 48/2016 no tutela diretamente ba Primeiru Ministru.
Centro Nacional Chega ninia vizaun mak sosiedade ida ne’ebé inkluzivu, la repente istória pasadu nian, moris iha dame no respeita ba direitu umanu, nune’e CNC nia misaun mak harii sentru post-konflitu ne’ebé prezerva memória pasadu hodi promove direitu no valór umanu, harii parseria nasionál no internasionál hodi reforsa rede servisu sira atu implementa rekomendasaun sira hosi relatóriu final Komisaun Akollamentu Verdade no Rekonsiliasaun (CAVR-sigla portugés)-Chega, no Komisaun Verdade no Amizade (CVA- sigla-portugés)- Pre Memoriam ad Spem, sira ne’ebé relevante.
Atividade aniversáriu CNC ne’e sei realiza iha salaun konferénsia Centro Nacional Chega, Antigu Komarka Balide, Dili no partisipante ne’ebé sei partisipa iha komemorasaun ne’e mak hanesan, Diretór Ezekutivu, CNC Hugo Maria Fernandes, hosi AJAR, Ministériu Negósiu Estranjeiru no Kooperasaun (MNEK), Ministériu Saúde, no maioria hosi Asosiasaun Vítima, eis Prizioneiru Polítiku sira, ho mós organizasaun sosiedade sivíl sira iha Dili laran, no Ministériu Solidariedade Sosiál no Inkluzaun (MSSI) maibé la marka prezensa.
Jornalista : Arminda Fonseca
Editór : Francisco Simões
