BAUCAU, 19 jullu 2021 (TATOLI)—Xefe suku Triloka, postu admistrativu Baucau villa, munisípiu Baucau, Alexandre da Costa, hateten, autoridade komunitáriu durante ne’e sempre ajuda komunidade prepara dokumentu bainhira tama ona idade 60, maibé iha pedidu balun tama lista benefisiáriu subsídiu idozu ne’ebé durante tinan tolu ona seidauk hetan resposta.
“Tinan rua ba tolu ona iha pedidu hamutuk 10 resin mak seidauk aprovadu, tama tinan 2021 aprova de’it ema na’in-ida mak sai benefísiariu. Konfuzaun tanba naran balun ami hatama kleur ona, ami lahatene mosu problema iha parte sosiál munisipál ka nasionál, ami lahatene maibé ami sempre ezije, sira dehan hein de’it,” Xefe suku informa ba Agência TATOLI, iha ninia knaar fatin, Triloka, segunda ne’e.
Notísia relavante: BNCTL Baucau husu benefisiáriu idozu sira kumpre protokolu saúde
Líder komunitáriu komunika ona ba konsellu suku, aldeia, inkui delegadu sira, iha loron 23 jullu bainhira realiza pagamentu, tenke aplika regra prevensaun COVID-19 tuir orientasaun saúde.
“Ami preparadu, nafatin fó hanoin ba ita-nia komunidade sira, molok atu simu subsídiu tenke uza máskara no halo distánsia fíziku,” nia akresenta.
Suku Triloka iha komunidade hamutuk lima mak óbitu, nune’e parte família lahetan ona direitu.
Enkuantu, tuir dadus, totál idozu no invalidéz sira iha suku ne’e hamutuk 161, hosi aldeia Aubaka, Baduho’o, Makadae no Lekiloiuatu.
Munisípiu Baucau daudaun ne’e parte Banku Nasionál Komérsiu Timor-Leste (BNCTL, sigla portugés) halo pagamentu ona ba idozu no invalidéz, hahu iha loron 23 fulan juñu.
Jornalista : Natalino Belo
Editora : Julia Chatarina
