BOBONARO, 22 jullu 2021 (TATOLI)—Asosiasaun Futeból Bobonaro (AFB) halo ona abertura ba jogu sub-22 ba tinan 2021, iha kampu futeból postu administrativu Maliana, munisípiu Bobonaro, kinta ne’e.
Sekretáriu autoridade munisípiu Bobonaro, Júlio Caero ne’ebé reprezenta prezidente Autoridade hodi halo abertura ba eventu ne’e, espera katak ho eventu ne’e bele prepara foin-sa’e sira, atu ba kompete iha eventu nasionál no internasionál.
Notísia relevante:FFTL fó formasaun arbitrazen ba joven na’in 25 iha Bobonaro
Alende ne’e, atu anima mós komunidade, nune’e bele hametin paz no estabilidade iha munisípiu Bobonaro.
“Agradese no apresia tebes ba komisaun organizadora. Eventu ida-ne’e atu aumenta talentu foinsa’e sira-nian, hodi hili no halo selesaun, nune’e prepara eventu bo’ot sira iha nasionál. Tanba ne’e, ha’u husu alin-sira labele hatudu atitude la di’ak iha kampu,” Júlio Caero hateten.
Nune’e mós segundu komandante PNTL, munisípiu Bobonaro, Asistente Superintendente Fásio de Jesus, hateten polísia sei garante seguransa durante jogu hahú to’o remata, maibé presija mós kontribuisaun entidade hotu-hotu.
Prezidente Komisaun organizadora, José Guterres, hateten jogu ne’e AFB realiza hanesan planu anuál katak tinan ida tenke realiza eventu dala ha’at, maibé iha tinan ne’e mundu enfrenta hela situasaun COVID-19, nune’e jogu balun labele realiza, ikus-mai konsege realiza de’it jogu sub-22.
Asosiasaun mós iha ona planu katak, bainhira remata jogu sub-22 iha fulan outobru sei loke tán kompetisaun femenina, tanba partisipasaun feto iha desportu futeból iha ona.
“Primeiru lugár sei hetan $400, segundu lugár $300 no terseiru lugár $200 depois sei fó mós ba sira jogadór diak liu no markadór ka top skore,” José Guterres.
Atividade ne’e realiza tanba hetan apoiu $1.000 hosi Federasaun Futebol Timor-Leste (FFTL) no klube ne’ebé partisipa iha kompetisaun ne’e hamutuk 22, mai hosi postu administrativu, Maliana, Atabae no Balibo.
Iha abertura Jogu ne’e, Klube Mocar FC derrota 2-0 kontra Maliana United, golu primeiru ne’e marka hosi jogadór ho númeru kamizola 5 iha minutu 68, liu de’it minutu tolu Maliana United hasa’e tan nia ritmu jogu ne’ebé konsege prodús tán golu daruak hosi jogadór ho númeru kamizola 16 to’o jogu remata.
Jogu ne’e lidera hosi árbritu lokál, Jefriano Loi Maya dos Santos, Asistente primeiru Domingos Vicente, asistente segundu Mateus Marques. Árbitu ne’e hala’o formasaun arbitrázen iha tinan kotuk ho sertifikadu Level C.
Jogu ne’e hetan partisipasaun másimu hosi komunidade Maliana, inklui adeptu-sira hosi klube hirak ne’ebé partisipa iha aventu ne’e.
Jornalista: Sérgio da Cruz
Editór: Cipriano Colo
