PCIC rekolla vestíjiu biolóziku ba kazu soe bebé iha Manleuana

DILI, 22 jullu 2021 (TATOLI)—Polísia Sientífika Investigasaun Kriminál (PCIC sígla portugés), rekolla ona informasaun vestíjiu biolóziku ba kazu soe bebé, iha suku Manleuana, postu administrativu Dom Aleixo, munisípiu Dili, iha domingu (18/07/21).
Tuir informasaun ne’ebé Agênncia Tatoli asesu hosi ofisiál PCIC iha kinta ne’e katak, vestíjiu biolóziku hanesan materiál-sira ne’ebé rekolla iha terrenu, iha bebé nia-isin no testemuña balun hanesan primeira delizénsia.
Notísia relevante:Polísia kontinua buka-tuir autór soe bebé iha Manleuana
PCIC mós simu ona delegasaun kompeténsia hosi Ministériu Públiku (MP), ba prosesu ne’e no daudaun ne’e identifika hela autór ba kazu ne’e.
Antes ne’e, portavóz Komandu Jerál PNTL, Superintendente Xefe, Arnaldo Araújo, haktuir informasaun ne’ebé polísia rekolla katak, domingu (18/07) madrugada tuku 04:15 otl, ema deskoñesidu soe bebé ida iha ema nia uma oin.
Bebé ne’e hetan hosi família-sira ne’ebé hela besik no informa kedan ba parte polísia hodi halo kedan observasaun iha fatin no lori kedan bebé ne’e ba iha Sentru Saúde Comoro hodi hetan tratamentu saúde.
Jornalista: Nelson de Sousa
Editór: Cipriano Colo

