BAUCAU, 27 jullu 2021 (TATOLI)–Admistradór postu admistrativu Baucau villa, Francisco Ximenes, hateten, inan-aman ne’ebé sai benefosiáriu ba subsísiu idozu no invalidez sira iha suku 11 postu Baucau villa, ne’ebé seidauk simu pagamentu bele delega reprezentante família ho vistu deklarasaun iha postu molok simu osan iha banku.
“Direitu ema-nia sei la lakon, maibé tanba situasaun no kondisaun balun la premite, entaun hein ho pasiénsia no hakbesik-an ba xefe suku no aldeia atu fasilita deklarasaun ruma no lori mai iha postu atu vistu, nune’e família ka oan bele reprezenta atu ba foti iha banku,” Administradór postu ne’e, informa ba Agência TATOLI, iha ninia knaar fatin, segunda ne’e.
Tuir nia, subsídiu hanesan direitu ba ema, tanba ne’e sei la lakon, tanba ne’e karik iha inan-aman ne’ebé seidauk simu osan tuir oráriu tanba asuntu privadu ruma, bele foti osan direita iha Banku bainhira iha ona tempu.
“Inan-aman hosi suku 11 iha postu Baucau villa seidauk simu subsídiu bele hakbesik-an ba banku atu hetan sira-nia direitu hanesan maluk sira seluk,” nia akresenta.
Antes ne’e, pagamentu subsídiu ba benefisiáriu iha postu admistrativu Baucau villa rasik hahú hosi suku Bahu iha loron 23 juñu no tuir kalendáriu sei termina iha loron 28 jullu 2021 iha suku Uailili ho totál benefisiáriu hamutuk 4.527.
Jornalista : Natalino Belo
Editora : Julia Chatarina
