DILI, 29 jullu 2021 (TATOLI) — VIII Governu Konstitusionál lideradu Primeiru Ministru Taur Matan Ruak, asegura ona vítima inséndiu ne’ebé afeta uma kain 500 iha eis merkadu Comoro.
Inséndiu ne’e akontese iha loron kinta madrugada tuku 03:30, iha Aldeia 03, Suku Fatuhada, Postu Administrativu Dom Aleixo, Munisípiu Dili.
Vise-Ministra Solidaridade Sosiál no Inkluzaun (MSSI), Signi Chandrawati Verdial, hatete dadus provizóriu ba vítima inséndiu iha eis Merkadu Comoro hamutuk uma-kain 500.
“Ita sei asegura uluk mak vítima afetadu sira maibé prioridade liu inan isin-rua, labarik no bebé no ema ho defisiénsia sira. Ida-ne’e mak atendimentu dahuluk ba vítima hafoin haree fali pakote rekuperasaun. Tanba ema-nia vida importante,” Signi Chandrawati Verdiál informa ba jornalista sira, iha eis Merkadu Comoro, Dili, kinta ne’e.
Nia hatutan, apoia umanitáriu ba vítima sei haree liu grupu vulnerável sira, inan isin rua, inan ho oan nurak, ferik-katuas sira, ema ho defisiénsia.
“Grupu sira-ne’e ita kategoria ba grupu nutritivu atu fó kondiasaun saúde di’ak. Maibé iha oras 24 ne’e ita-nia apoiu ba sira mak tenke asegura atu iha fatin di’ak no seguru no hahaan ba sira,” nia dehan.
Entretantu, Sekretáriu Estadu Protesaun Sívil (SEPS), Alexandre Gusmão, hateten apoia dahuluk ba vítima inséndiu horikalan mak hahaan tasak hodi atende ba meudia nian depois mak haree ba faze rekuperasaun nian.
“Ita ohin hamutuk ho Ministériu Administrasaun Estatál, Vise-Ministra Solidaridade Sosiál no Inkluzaun (MSSI), deside ita sei fó atendementu uluk ba vítima ne’ebé dezde horikalan to’o agora seidauk haan. Nune’e ita hanoin fó hahaan tasak ba sira. Depois ami mós mobiliza ona fatin iha Eskola infantil Comoro nian atu akomoda sira provizóriu no sei estabelese dapur jerál hodi vítima organiza malu no tein mak haan,” SEPS dehan.
Hafoin ida-ne’e, Governu sei halo identifikasaun ba fatin ne’ebé hetan estragu no ahi-haan, uma, ema mane no feto hira, labarik, inan isin-rua hafoin apoia seluk sei mai.
Governante ne’e hatutan, ekipa sei lori tenda hodi monta nune’e vítima sira bele deskansa no hein apoia ba faze tuir mai.
Relasiona ho inséndiu ne’e, Ministra Saúde (MS), Odete Belo husu ba autoridade lokál atu prepara mós fatin ka tau lona nune’e karik vítima presiza MS bele autoriza médiku sira halo tratamentu ba sira.
“Ita haree labarik mós barak, inan isin rua no ferik-katuas nune’e, ohin, ha’u hato’o ona ba xefe aldeia atu hatudu fatin ida atu ita tau lona no ita bele haruka ita-nia médiku sira mai halo tratamentu ba ita-nia vítima sira,” Ministra hateten.
Purtantu Xefe Aldeia 03, Suku Fatuhada, Postu Administrativu Dom Aleixo, Munisípiu Dili, Zeferino Bráz hatete dadus provizóriu ba vítima inséndiu hamutuk atus-lima.
“Ida-ne’e dadus provizóriu hodi hato’o ba Governu atu atende uluk vítima iha oras meodia ka haan nian. Depois mak ita rekolla dadus konkretu ba faze apoiu tuir mai,” nia hateten.
Xefe Aldeia ne’e fó-sai katak, inséndiu ne’e akontese iha tuku 03:30, maibé nia simu telefone ne’e iha ona oras 04:00.
Maibé kona-ba kronolojia inséndiu ne’e seidauk hatene ho loloos, katak ahi sirkuitu mak da’et tutan ba seluk ka oinsá maibé to’o agora seidauk identifika motivu loloos hosi inséndiu ne’e rasik.
Iha fatin hanean, vítima, Marino Piedade, haktuir ahi suar sa’e tiha mak nia foin hatene no halai maibé ho liman tanan de’it.
Jornalista : Osória Marques
Editór : Cancio Ximenes
