DILI, 30 jullu 2021 (TATOLI)—Agência Noticiosa de Timor-Leste, Tatoli,I.P, realiza kolókiu ida ho tema: ‘Papél Tatoli,I.P ba susesu eleisaun Prezidensiál iha tinan 2022’.
Kolókiu ne’e realiza iha ámbitu komemorasaun aniversáriu ba dala-lima (5) ho tema: Olhar o Passado, atuar no presente e projetar no futuro ka hateke ba pasadu, hala’o iha prezente no projeta ba futuru.
Notísia relevante:Aniversáriu TATOLI, I.P ho misa agradesimentu
Oradór importante-sira iha kolókiu ne’e mak hanesan, Laureadu Nobel ba Pás, José Manuel Ramos Horta, Prezidente Comissão Nasional das Eleições (CNE), Alcino de Araújo Barris, Diretór Jerál Sekretariadu Tékniku Administrasaun Eleitorál (STAE), Acilino Manuel Branco, Prezidente Conselho Imprensa (CI), Virgílio Guterrres, rerezentante Partidu Polítiku hosi Partidu Libertasaun Populár (PLP), Demétrio de Carvalho Amaral, rerezentante Partidu Politiku hosi Partidu Demokrátiku (PD), Nino Pereira, diretór Komisaun Justisa no Pás Arkedioseze Dili, Padre Demétrio da Conceição Xavier.
Konvidadu importante-sira ne’ebé partisipa direta kolókiu ne’e mak hanesan, Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, Sekretáriu Estadu Komunikasaun Sosiál (SEKOMS), Mericio dos Reis Akara, korpu diplomátiku, parseiru no konvidadu sira-seluk.
Perante serimónia ne’e, sei lansa mós Mata-dalan Tatoli,I.P ba kobertura eleisaun jerál, ne’ebé prepara hosi komisaun preparativu.
Sei iha mós lansamentu ba Plataforma Multimédia, tanba Tatoli,I.P daudaun-ne’e iha ona portál Youtube ho naran Antil Tatoli.IP ne’ebé estabelese ona iha fulan-maiu 2019 no ohin sei lansa tán programa foun haat maka entrevista eskluzivu, emprendedorizmu, motivasaun no eroizmu.
Ekipa fotógrafu, hala’o mós espozisaun fotografia no kolókiu ne’e rasik sei iha transmisaun direta hosi live streaming Rádiu Televizaun Timor-Leste, Empreza Públika (RTTL,E.P), iha tuku 17:00 to’o 18:00 otl, ohin.
Tatoli,I.P, lansa dahuluk hosi eis Primeiru-Ministru (PM), Rui Maria de Araújo, iha 27 jullu 2016 nu’udár embriaun no iha 2017 transforma ba Institutu Públiku (I.P), hanesan fonte informasaun ofisiál Estadu Timor-Leste ida ne’ebé kredível, ijenta, rigór no integridade ho karáter multi plataforma, multi tarrefa, multi média no multi kanál iha nível nasionál, rejionál no kontinentál.
Jornalista: Antónia Gusmão
Editór: Cipriano Colo
