BOBONARO, 06 agostu 2021 (TATOLI)—Ministra Saude (MS), Odete Maria Freitas Belo, preokupa ho eventu futeból sub-22 ne’ebé realiza iha kampu futeból Maliana, munisípiu Bobonaro, halibur ema barak no la kumpre protokolu hosi Organizasaun Mundiál Saúde (OMS).
Tuir observasaun Odete Maria Freitas Belo iha kinta (05/08) nota katak, adeptu-sira ne’ebé mai asiste jogu, barak mak la uza máskara no laiha distansiamentu sosiál.
Notísia relevante:MS Observa konstrusaun armazen SAMES Bobonaro
“Ita halibur ema barak kuaze distansiamentu sosiál laiha, máskara de’it mós la uza. Ha’u hanoin ita dook liu ona hosi protokolu saúde mundiál,” Ministra hateten ba jornalista Agência Tatoli, iha armazen SAMES, suku Lahomea, sesta ne’e.
Governante ne’e mós observa durante halo vizita fatin-sira iha munisípiu Bobonaro, komunidade barak liu mak la uza mascara.
Tanba ne’e, nia husu atu komunidade kontribui ba prevensaun COVID-19 liuliu agora Governu preokupa ho populasaun ne’ebé hela iha liña fronteira, tanba iha variante foun Delta ninia transmisaun lalais liu.
Jornalista: Sérgio da Cruz
Editór: Cipriano Colo
