DILI, 09 agostu 2021 (TATOLI)—Ministériu Justisa (MJ), sei emite uluk sertifikadu ba parsela rai hamutuk rihun 200 iha territóriu tomak ne’ebé laiha disputa, tuir rejistu Serbisu Nasionál Kadástru (SNC sígla portugés).
Ministru Justisa, Manuel Cárceres da Costa, submete ona dekretu lei rejistu prediál no kódigu kadástru ne’ebé sai hanesan mekanizmu atu emite sertifikadu na’in ba rai, iha ona Prezidénsia Konsellu Ministru (PCM sígla portugés), hodi hein diskusaun no aprovasaun.
Notísia relevante:Kódigu rejistu prediál ho kódigu kadastru nu’udar mekanizmu emite sertifikadu na’in ba rai
“Bainhira dekretu lei ne’e hetan ona aprovasaun, sei haruka ba Prezidente Repúblika (PR) atu hetan promulgasaun. Ita sei hasai despaixu atu legaliza, hodi omologa parsela rai rihun 200 ne’ebé antes ne’e SNC rejista no laiha disputa hahú fó títulu sertifikadu,” Manuel Cárceres, hateten ba jornalista Agência Tatoli, iha kna’ar fatin, Caicoli, segunda ne’e.
MJ mós prepara hela formasaun kona-bá prosedimentu rejistru prediál ba kuadru profisionál notariadu no konservadór na’in 21 hodi emite sertifikadu.
Nia dehan, preparasaun seluk maka Ministériu halo ona kontaktu ho empreza internasionál ida, atu halo avaliasaun téknika ba sistema informátika dijitalizadu, iha rejistu notariadu hodi upgread tanba iha ligasaun ho Diresaun Nasionál Terra no Propriedade (DNTP), liu-liu diresaun Nasionál kadastrál, Komisaun Terras, nune’e notariadu no konservatór hasai títulu propriedade ho loloos.
“Empreza ne’e, sei halo avaliasaun hodi rekomenda saida mak presiza hadi’a, nune’e buat hotu-hotu la’o di’ak, tinan oin bele hahú emite ona sertifikadu rai,” nia subliña.
Governante ne’e hateten, parsela rai ne’ebé iha disputa, Komisaun Terras ne’ebé sei estabelese sei rezolve tuir métodu konsiensializasaun, bainhira rezolve ona hodi halo rejistu iha konservadór no notariadu bele fó ona títulu.
Disputa seluk ne’ebé ninia prosesu iha ona Tribunál, bainhira iha ona dezisaun sei atribui mós sertifikadu.
Tuir dadus kadastrál hosi rezultadu Serbisu Nasionál Kadástru (SNC) ne’ebé halo tiha ona, rejistu númeru iha territóriu hamutuk 318.000 ne’ebé entrega ona ba DNTP iha ne’ebé parsela rai 42.000 mak sei iha disputa ho ninia klasifikasaun entre rai privadu (hanesan balun sukat rai liu tiha ida ninia baliza ka área) no disputa privadu ho Estadu (hanesan privadu mak sukat fali rai Estadu).
Hosi númeru disputa ne’e, terras no propriedade foin rezolve to’o 8%, tanba ne’e hein katak, komisaun terras ne’ebé sei estabelese bele rezolve ho di’ak liu-tán.
Notísia relevante:SETP sei estabelese komisaun terras rezolve disputa rai
Jornalista: Nelson de Sousa
Editór: Cipriano Colo