OÉ-CUSSE, 10 agostu 2021 (TATOLI)-Durante fulan neen, hahú hosi janeiru to’o juñu 2021, Servisu Saúde Rejiaun Administrativa Espesiál Oé-Cusse Ambeno (RAEOA), rejista kazu moras Infesaun Respiratóriu Alta (IRA) hamutuk 5.495.
Adjuntu Diretór Servisu Saúde RAEOA, Fugundo Lafo, informa servisu saúde rejionál kontinua hala’o servisu esensiál inklui atendimentu ba pasiente moras IRA, maski iha situasaun pandemia COVID-19.
“kazu sira ne’e rejista iha postu saúde no sentru saúde sira, relata mai iha servisu saúde rejionál hosi trimestre primeiru janeiru to’o marsu 2021 hamutuk kazu 3.688 kategoria feto 1.556 no mane 2.132, ba trimestre segundu hosi abríl to’o juñu hamutuk 1.805 kompostu hosi mane 1.098 no feto 707,” Fugundo Lafo informa ba Agência Tatoli iha Sikluli, Suku Costa, Sub-rejiaun Pante Makasar, tersa ne’e.
Nia dehan, entre kazu hirak ne’e la-rezulta mate, maibé nia kauza prinsipál hosi moras IRA ne’e maka ambiente hela fatin sai hanesan fatór esensiál atu hamosu kazu espiatóriu, hanesan komunidade la kuidadu ambiente atu moris iha ambiente saudavel.
Meius ne’ebé servisu saúde rejionál hala’o atu prevene moras IRA ne’e, maka servisu saúde rejionál kontinua halo promosaun saúde ba komunidade nune’e kuidadu-an iha ambiente ne’ebé mak ladún saudavel nune’e bele prevene-an hosi moras IRA.
Sentru saúde iha Rejiaun Administrativa Espesiál Oé-Cusse Ambeno hamutuk haat iha sub-rejionál haat, no postu saúde hamutuk 19 iha suku 18.
Jornalista : Abílio Elo Nini
Editór : Francisco Simões
