DILI, 10 agostu 2021 (TATOLI)–Prezidente interinu partidu Os Verdes Timor-Leste, Lela Huno, iha tersa ne’e hasoru malu ho Primeiru-Ministru (PM), Taur Matan Ruak, hodi informa asuntu liga ho ezisténsia partidu, liuliu dezafiu prosesu rejistu partidu.
“Tinan ne’e rejista partidu lubuk ida ne’ebé hasoru situasaun diferente ho partidu sira ne’ebé mak rejista ona, ezemplu mak komprovasaun identidade, la’ós de’it hatama kartaun eleitorál maibé identidade pesoál sira hanesan Billete Identidade (BI) no sertidaun tuir Lei Partidu Polítiku artigu 13 númeru 3 haruka,” Prezidente interinu partidu informa hafoin hasoru malu ho Xefe Governu, iha Rezidénsia Farol, tersa ne’e.
Notísia relevante: Ministru Justisa indefere diretamente kandidatu Partidu Os Verdes
Antes ne’e, partidu foun ne’e aprezenta dokumentu iha tinan kotuk maibé hetan indeferimentu dahuluk hosi Tribunál, hafoin aprezenta tan no hetan kestaun hanesan hosi Ministériu Justisa, nune’e aprezenta rekursu ba Tribunál no ikus mai a-favór ba desizaun Ministériu Justisa nian, katak aprezenta mós kartaun komprovativu seluk hodi rejistu partidu.
“Tanba ne’e, preparasaun Os Verdes atinje ona 75%, ami planeia lori fali partidu ne’e ba rejistu iha Tribunál Rekursu iha fulan-outubru tinan ne’e,” Lela Huno dehan.
Aleinde ne’e, Responsável partidu ne’e esplika oituan vizaun no misaun partidu ba PM.
“Vizaun ba Estadu Timór ne’e halo nusa tanba partidu ne’e iha nasaun barak eziste ona ho pensamentu atu harii sosiedade ne’ebé inkluzivu no sustentável multi dimensionál,” nia akresenta.
Iha biban ne’e, Prezidente interinu husu Xefe Ezekutivu atu fó lia-menon ba partidu no membru sira, hodi lori partidu ne’e to’o objetivu finál.
Nune’e, mensajen importante hosi Xefe Governu ba partidu Os Verdes, katak tempu ona ba joven sira atu brani hambrik iha partidu ida atu fó dezenvolvimentu sosiu ekonómiku, kulturál no ambientál nasaun.
Jornalista : Antónia Gusmão
Editora : Julia Chatarina
