DILI, 12 agostu 2021 (TATOLI)—Prezidente Repúblika (PR), Francisco Guterres “Lú Olo”, uza nia kompeténsia konstitusionál, veta alterasaun dahuluk ba lei resenseamentu eleitorál ne’ebé Tribunál Rekursu deklara inkonstitusionalidade ba artigu 17 númeru 2, Dekretu Parlamentu Nasionál númeru 43/V-Primeira alterasaun ba Lei númeru 6/2016, 25 maiu, Lei Resenseamentu Eleitorál.
Liuhosi analiza ba Dekretu Parlamentu Nasionál ne’e, iha 23 jullu, Prezidente Repúblika Francisco Guterres “Lú Olo”, hato’o pedidu ba Tribunal Rekursu halo fiskalizasaun preventiva ba konstitusionalidade Dekretu Parlamentu Nasionál. Nune’e, iha 6 agostu 2021, Tribunál Rekursu deklara artigu 17 númeru 2 hosi Dekretu Parlamentu Nasionál mak Inkonstitusionál. Akórdaun Tribunal Rekursu hateten katak artigu 17 númeru 2 hosi Dekretu Parlamentu Nasionál konfronta ho artigu 38 hosi Konstituisaun, viola direitu ba klarifikasaun kona-ba finalidade ba dadus sira, enkuantu hakat liu direitu ba koñesimentu ba dadus pesoa, ne’e viola prinsípiu ba espesifikasaun ba finalidade no limitasaun ba uzu, ne’ebé hateten iha artigu 38 hosi Konstituisaun, introdús restrisaun ne’ebé bele vulnera, ho dalan injustifikadu no ho forma la proporsionál, tuir direitu ne’ebé previstu iha artigu 38 Konstituisaun.
Akórdaun Tribunal Rekursu nian deside katak artigu 17 númeru 2 husi Dekretu Parlamentu ne’ebé hateten Diretór Jerál STAE autoriza komunikasaun dadus konstante hosi Baze de Dadus Resenseamentu Eleitorál ho instituisaun bankária, finanseira no telekomunikasaun ne’ebé hetan lisensa iha territóriu nasionál, ba efeitu verifikasaun identidade, rezidénsia, inskrisaun iha Baze de Dadus Resenseamentu Eleitorál, no númeru kartaun eleitór hosi kliente, no iha ámbitu operasaun no prosedimentu kontrolu internu ba identifikasaun kliente sira no ba prevensaun brankamentu kapitál no hosi finansiamentu terrorizmu.
“Artigu ida-ne’e la tuir Konstituisaun artigu númeru 38 ne’ebé garante direitu ba liberdade, seguransa no integridade ema ida-idak ninian,” Xefe Estadu deklara liuhosi komunikadu imprensa ne’ebé mak Agência Tatoli simu hosi mídia Gabinete Prezidénsia Repúblika, kinta ne’e.
Dekretu Parlamentu Nasionál númeru 43/V- Primeira alterasaun Lei Resenseamentu Eleitorál, iha Sesaun Plenária Parlamentu Nasionál aprova ho unanimidade ho votu 62 iha loron 28 juñu 2021.
Jornalista : Osória Marques
Editór : Francisco Simões
