DILI, 17 agostu 2021 (TATOLI)—Hahú hosi 09 to’o 17 agostu, Polísia Nasionál Timor-Leste (PNTL), rejista ema na’in-ida mate tanba asidente tráfegu.
Portavós Komandu Jerál PNTL, Superintendente Xefe, Arnaldo Araújo, informa relatóriu iha semana rua rejista katak, iha insidente hamutuk 20 iha territóriu, kompostu hosi karreta xoke-malu tolu, motór ho motor rua, karreta ho motór haat, karreta ho motór monu rasik hitu, soke ema la’o-ain iha haat.
Notísia relevante:Maiu, PNTL rejista insidente-asidente 41 maioria kazu violénsia doméstika
“Hosi asidente ne’e vítima kanek kamán 28, kanek todan ida hodi hala’o tratamentu iha ospitál no mate ida iha Lautém,” Arnaldo Araújo, hateten ba jornalista-sira liuhosi konferénsia imprensa, iha Komandu Jerál PNTL, Caicoli, tersa ne’e.
Bazeia ba investigasaun hosi polísia, asidente ne’e akontese tanba fatór umanu, halai ho velosidade makás.
Tanba ne’e, Komadu Jerál PNTL apela nafatin ba motorista hotu-hotu atu kondús transporte ho kuidadu tanba daudaun anin boot.
Jornalista: Nelson de Sousa
Editór: Cipriano Colo
