VIQUEQUE, 17 agostu 2021 (TATOLI)—Ministériu Saúde (MS) ho Fundu Nasaun Unida ba Infánsia (UNICEF sígla inglés) halo advokasia nível munisípiu atu re-ativa programa kona-bá Grupu Suporta Inan (GSI), hodi hasa’e nutrisaun iha munisípiu Viqueque.
“Programa ne’e atu la’o di’ak presiza partisipasaun ema hotu-nian. Ita presija apoiu hosi líder munisipál nian hodi orienta autoridade lokál-sira bele partisipa iha grupu suporta inan no enkontru re-ativasaun ohin nian susesu tanba autoridade-sira partisipa másimu,” Diretora Jerál Prestasaun Serbisu Saúde, Odete da Silva Viegas, hateten ba jornalista Agência Tatoli, iha salaun serbisu edukasaun munisípiu Viqueque, Beloi, tersa ne’e.
Notísia relevante:Populasaun Viqueque 92% la soe foer-boot arbiru
Objetivu hosi programa ne’e atu promove pratika-sira uma-nian ne’ebé foka ba nutrisaun ho intensaun atu hasa’e moris saudável inan no oan.
Grupu alvu iha programa ne’e maka médiku destakadu iha suku, inan no aman hosi labarik tinan lima mai karaik.
Grupu ne’e estabelese iha tinan 2017, maibé agora mak foin re-ativa tanba durante ne’e paradu kauza hodi problema finanseiru no COVID-19.
Iha fatin hanesan, diretora interina servisu saúde munisípiu Viqueque, Adelaide Maria Tilman, agradese ba parte MS no grupu suporta inan hamutuk 135 hosi postu administrative lima iha munisipiu Viqueque ne’ebé harii iha tinan 2017.
Nune’e mós adiministradór Munisípiu Viqueque, Januário Soares ‘Bolly’ konsidera reativasaun programa ne’e iha Viqueque, sei tulun di’ak liu tán inan-sira.
“Ha’u lori povu Viqueque nia naran agradese ba UNICEF tanba iha interese atu apoia Viqueque,” Autoridade munisipál ne’e agradese.
Tuir dadus hosi UNICEF hatudu katak, labarik TL ho idade lima mai karaik enfrenta mal nutrisaun aas liu iha Ázia no mós todan la ekilíbriu ho idade.
Peskiza ne’e hatudu katak, taxa hosi fó susu-been esklusivu diferente iha rai laran (28%-75%) no mós menus iha diversidade ai-han ho 18% de’it, hosi labarik tinan rua mai karaik ne’ebé konsumu ai-han aseitável.
Programa ne’e, hetan fundu hosi UNICEF atu estabelese no mentór Grupu Suporta Inan (GSI) iha munisípiu rua iha Timor-Leste.
Grupu hirak-ne’e kompostu hosi voluntáriu-sira hosi komunidade mane no feto, no implementa iha suku hotu iha munisípiu ne’e.
Jornalista: Vitorino Lopes da Costa
Editór: Cipriano Colo
