DILI, 18 agostu 2021 (TATOLI)—Veteranu no Deputadu, José Agostinho Siqueira ‘Somotxo’, hateten insureisaun armada ne’ebé akontese iha Suku Aissirimou, Aileu, iha 1975 mak haforsa no hametin liután ezisténsia Forsa Armada Libertasaun Nasionál Timor-Leste (FALINTIL).
José Agostinho Siqueira ‘Somotxo’ haktuir, iha loron 15 agostu tinan 1975 hahú ona insureisaun armada iha Aissirimou, Aileu.
“Ida-ne’e mak loke dalan Povu hamriik atubele tau iha prátika saida mak iha momentu insureisaun hakarak. Insureisaun iha 15 agostu 1975 nu’udar prátika ne’ebé halo asaun militár hasoru UDT mak iha 20 agostu 1975 no mai 20 agostu 2021, ita iha tinan 46 ona,” Somotxo informa ba Agêncoa TATOLI, relasiona ho selebrasaun aniversáriu FALINTIL ba dala-46 ne’ebé sei selebra iha 20 agostu 2021.
Iha 20 agostu, nia haktuir, sein ema-ida mate nein malae no nein timor-oan ne’ebé konsege dezarma ezérsitu portugés sira hafoin organiza FALINTIL, hodi halo operasaun kontra golpe, no Rogério Lobato mak Komandante FALINTIL.
Nia dehan, iha momentu ne’e Aileu nu’udar sentru instrusaun ezérsitu portugés nian entaun buat hotu-hotu kompletu.
“Insureisaun armada momentu ne’e timor-oan sira hamriik uluk hasai kilat hotu iha Aileu mak foin loke iha 20 agostu ne’e, tanba ne’e mak lori tempu naruk uitoan. Depois loron lima (5) mak foin kontrola Aileu,” nia haktuir.
Nia dehan, saudozu Nicolau Lobato nu’udar ema-ida ne’ebé sempre hamriik iha oin harii FALINTIL hafoin Rogério Lobato tau iha prátika nu’udar komandante FALINTIL nian no ikus mai sai Ministru Defeza iha 1975.
“Insureisaun armada ne’e realiza tanba timor-oan lubuk ne’ebé barani aseita risku hotu-hotu tanba momentu ne’e nu’udar golpe ida-ne’ebé konsege halo iha Aileu tanba Aileu momentu ne’e nu’udar sentru instrusaun ezérsitu portugés nian. Ita hateke ba kotuk triste no haksolok. Ita triste tanba hahú hosi 1975 to’o 1999 ita lakon maluk di’ak barak mate ba rai ida-ne’e nia ukun rasik-aan. Kontente tanba ita hetan ona ukun rasik-an,” nia dehan.
Nu’udar veteranu, sidadaun no reprezentante povu ejize nafatin katak Governu tenke preokupa ba F-FDTL tanba tama ona tinan 46 entaun Governu tenke preokupa nia modernizasaun no ninia dezenvolvimentu atu lori nafatin obra ne’ebé uluk FALINTIL rai hela.
Tuir nia, ema-ne’ebé funda FALINTIL ne’e barak mate ona no moris mak Sekretáriu Jerál FRETILIN, Mari Alkatiri no sira seluk.
Nia dehan, membru F-FDTL atu banati espíritu FALINTIL tenke iha formasaun barak no membru idak-idak bele banati ho espíritu rasik.
Tanba ne’e, nia husuu ba joven sira tenke banati espíritu FALINTIL katak hatene halo problema maibé tenke iha kapasidade rezolve ne’e rasik ho responsabilidade.
Jornalista : Evaristo Soares Martins
Editór : Cancio Ximenes
