DILI, 19 agostu 2021 (TATOLI)—Prezidente Conselho de Imprensa (CI), Virgílio da Silva Guterres ‘Lamukan’, hateten iha tinan oin (2022) Conselho de Imprensa sei konsentra iha formasaun intelektuál ba jornalista sira.
Atu realiza planu ida-ne’e, CI sei apoiu organizasaun Timor-Leste Press Union (TLPU) no Asosiasaun Jornalista Timor Lorosa’e (AJTL) hodi dezenvolve no kapasita jornalista sira hodi konsentra iha formasaun intelektuál.
“Ita hein katak orsamentu tinan oin tama ona planu oinsá halo kooperasaun ho TLPU ho AJTL iha aspeitu formasaun ba jornalista sira. Formasaun ne’ebé CI sei konsentra mak formasaun intelektuál. Kestaun tékniku no profesionál ne’e, ha’u hanoin katak jornalista barak mak hatene maibé buat ne’ebé CI haree mak kapasidade intelektuál, kapasidade atu oinsá intrepeta faktu no kapasidade oinsá halo análiza ba asuntu ka kazu ruma. Ida-ne’e mak sei sai konsentrasaun CI nian atu servisu hamutuk ho TLPU ho AJTL,” Prezidente Conselho de Imprensa hateten ba jornalista sira, iha salaun Conselho de Imprensa, Quintal Boot, Dili, kinta ne’e.
Prezidente CI hateten, iha kooperasaun ne’e at fó kbiit ba organizasaun AJTL no TLPU ne’e bele garante no monitoriza ba membru sira-nia kobertura iha terrenu.
“Ha’u hanoin organizasaun rua ne’e iha obrigasaun atu fó atensaun ba nia membru sira tanba organizasaun rua ne’e, organizasaun profisionál ida entaun sira mós tenke garante no halo monitorizasaun ba sira-nia membru nia kobertura jornalístiku no preformance. Ida-ne’e ami enkoraja nafatin desde uluk,” nia dehan.
Tanba durante ne’e, Conselho de Imprensa observa katak, mídia emprime no eletronika ka online barak mak iha publikasaun seidauk balansu ba produsaun notísia ne’ebé kobre iha terrenu.
“Ida-ne’e mak durante ne’e ami haree mídia seidauk halo balansu ba produsaun notísia. Tanba, bainhira populasaun atu halo krítika ba Estadu no Governu maibé mídia públika ona no la konfirma ba parte relevante sira. Tanba ne’e, ami husu Xefe redasaun atu haree informasaun sira no tau atensaun ba ida-ne’e,” Virgílio hateten.
Maibé, nia dehan, CI apresia ba jornalista no mídia sira kontinua determinadu atu fó informasaun tanba jornalista la’ós grupu ida ba lina frente maibé grupu ida vulneravel ba COVID-19 nian, maibé ho situasaun hanesan ne’e mídia kontinua públika informasaun liuhosi televizaun, rádiu, jornál no online sira.
CI nia preokupasaun ida mak konteúdu notísia balun seidauk kompletu ho fonte ne’ebé kualifikadu liu-liu kona-ba transmisaun vírus nian no rezultadu hosi laboratóriu, tanba bainhira ko’alia kona-ba pandemia COVID-19 nian ne’e mídia uza fonte ida de’it hodi públika informasaun no mídia la konfirma ho fonte seluk.
“Kona-ba pandemia COVID-19, ita tenke konfirma ho médiku sira, ita labele ba entrevista ema politíku sira tanba sira la hatene. Maibé kestaun seluk, hanesan lei bele ita bele husu ba ema politíku sira maibé kestaun saúde tenke husu Ministériu Saúde tanba saúde mak hatene,” nia dehan.
Jornalista : Osória Marques
Editór : Cancio Ximenes
