BOBONARO, 19 agostu 2021 (TATOLI)—Serbisu Autónomu Medikamentu no Ekipamentu Saúde (SAMES), introdús sistema eletrónika farmaceútika ‘Msuplay’ liuhosi formasaun ba pesoál saúde hosi munisípiu Bobonaro no Liquiça.
Formasaun ne’e atu lori fila-fali implementasaun sistema Msuplay ba iha baze, nune’e fasilidade hotu-hotu iha sentru saúde-sira, bele utiliza halo jestaun ba sistema eletróniku, hodi hafásil serbisu farmasista sira-nian bainhira presiza distribuisaun ekipamentu médiku emerjénsia.
Notísia relevante:SAMES kontrata kompañia rua hodi fornese oksijéniu
“Ita halo treinamentu atu re-introdús sistema Msuplay ne’ebé antes ne’e paradu, no agora Governu autoriza ona atu implementa iha nasionál to’o baze, nune’e sira bele jere rasik sistema ne’e,” Diretór ezekutivu SAMES, Santana Martins, hateten ba jornalista-sira iha salaun mini Bar, natar ninin, suku Ritabou, kinta ne’e.
Sistema eletrónika ne’e foin utiliza iha edifísiu SAMES, Laboratóriu Nasionál no Hospitál Nasionál Guido Valadares (HNGV).
Tamba ne’e, SAMES planeia sei instala mós iha sentru saúde to’o postu saúde sira nune’e bele halo atendimentu saúde públika ho di’ak.
Sistema ne’e mós sei fó vantajen boot ba farmasista-sira, tanba hafásil atu halo komunikasaun ba SAMES nasionál, nune’e bele halo distribuisaun ai-moruk no ekipamentu médika ho lalais.
Iha fatin hanesan, Xefe sentru saúde Maliana, Luis Gonçalves, rekoñese formasaun ba sistema ne’e importante tebes tanba bele aumenta koñesimentu oinsá bele halo jestaun di’ak ba ekipamentu médiku.
Formasaun durante loron rua ne’e hetan partisipasaun másima hosi xefe sentru saúde-sira no farmasista-sira hosi Liquiça no Bobonaro.
Tuir planu, formasaun ne’e sei implementa mós iha munisípiu hotu-hotu, atu bele garante funsiomentu serbisu iha nível nasionál to’o baze.
Jornalista: Sérgio da Cruz
Editór: Cipriano Colo
