OÉ-CUSSE, 22 agostu 2021 (TATOLI)—Sentru Informasaun COVID-19, Rejiaun Administrativa Espesiál Oé-Cusse Ambeno (RAEOA), rejista kazu óbitu ida, kazu rekoperadu 54 no totál kazu ativu 124.
Kazu óbitu ne’e feto ida ho idade 61, hela iha Oé-Cusse, no iha 19 diagnótikada iha Hospitál Referénsia Oé-Cusse Ambeno, ho COVID-19.
Notísia relevante:COVID-19: óbitu rua, pozitivu 235 no ativu 3.264
Antes ne’e, pasiente sofre moras diabetes ho tempu naruk, nune’e iha 19 agostu sente iha síntoma COVID-19, hanesan mear, iis-boot, nune’e ba konsulta triájen, hospitál mak deteta ho rapid test hatudu rezultadu menus 25CT, pozitivu COVID-19.
“Ho ida-ne’e, pesoál saúde sira evakua kedan pasiente ne’e ba iha sala izolamentu Klíníka Kurasaun, no hetan akompañamentu hosi médiku espesialista-sira, depois haree hosi SPO2 ho glisemine aas tebes, normalmente glisemine ne’e sempre iha 7-14 ka 4-14 maibé ida-ne’e aas to’o 17 ba leten,” Sekretáriu Rejionál Asuntu Saúde, Manuel da Costa, informa ba Jornalista Agência Tatoli, iha Padimau, suku Costa sub-rejiaun Pante Makasar, domingu ne’e.
Iha 21 agostu kalan, tanba pasiente moras komplikadu no hakotu-iis ho COVID-19, nune’e família koordena ona ho ekipa saúde atu hala’o serimónia funerál iha semitériu Bairu Horta, suku Costa sub-rejiaun Pante Makasar, tuir protokolu ne’ebé adopta iha Timor-Leste.
Jornalista: Abílio Elo Nini
Editór: Cipriano Colo
