Ekipa konjunta PNTL konsege redús atividade ilegál iha fronteira

BOBONARO, 23 agostu 2021 (TATOLI)—Desde kolokasaun membru Polísia Nasionál Timor-Leste (PNTL), hosi Unidade Batallaun Órdem Públika (BOP), Kompañia Operasaun Espesial (COE), Task Force, inkkui membru FALINTIL Forsa Defeza Timor-Leste (F-FDTL), reforsa serbisu Unidade Patrullamentu Fronteira (UPF), konsege redús atividade ilegál iha fronteira terrestre, entre TL ho Indonézia.

Komandante PNTL munisípiu Bobonaro, Superintendente Antoninho Mauluta, observa progressu ne’e  iha semana kotuk, sidadaun-sira ne’ebé hala’o movimentu legál iha fronteira, maioria entrega-an ba autoridade Indonézia, hodi deporta mai Timor-Leste, tanba seguransa iha fronteira metin.

Notísia relevante:Ema na’in 21 fa’an kuda ilegál iha fronteira Covalima

“Hafoin kolokasaun membru PNTL hosi unidade sira inklui  ita-nia F-FDTL, mai ajuda UPF iha fronteira, ita kalkula ho situasaun antes pasajen ilegál aas, maibé agora daudaun ita hatún, tanba ita instala tan postu prvizoriu rua,” Superintendente Antoninho Mauluta, hateten ba jornalista segunda ne’e.

Maski movimentu ilegál komesa menus, maibé  komandu munisípiu Bobonaro mós orienta  nafatin  membru Ofisiál Polísia Suku (OPS), halo koordenasaun no mitigasaun hodi pasa informasaun ba autoridade lokál-sira iha fronteira, hodi apoia serbisu PNTL, nune’e bele tau forsa hamutuk, kontrola atividade ilegál, luta kombate kontájiu variante Delta.

PNTL mós instala ona postu vizilánsia provizóriu rua iha área Atos no Piron, hodi reforasa tan UPF komapañia Alfa iha Alto Lebos no tuir planu sei transforma sai postu permanente, hodi garante paz no establidade ba komunidade.

Fo-hanoin katak, sidadaun na’in 11 ne’ebé membru UEP datein iha área suku Saburai iha 07 fulan agostu, Komandu munisípiu Bobonaro konklui ona investigasaun no aprezenta ona relatóriu ba Komandu Jerál, hodi submete ba Ministériu Públiku (MP), nu’udár na’in ba prosesu.

Jornalista: Sérgio da Cruz

Editór: Cipriano Colo