DILI, 24 agostu 2021 (TATOLI)—Polísia Nasionál Timor-Leste (PNTL), munisípiu Dili, liuhosi Unidade Tránzitu, halo apreensaun ba karreta ualu (8) no motór tolu (3), tanba viola parázen marka estasionamentu.
Apreensaun ne’e hala’o bainhira realiza operasaun planeada iha área estasionamentu Audian no Loja Jacinto-nian, hodi kontrola parázen karreta no motór tuir marka estasionamentu ida-idak nian, iha kódigu estrada artigu 50 kona-bá estasionamentu.
Notísia relevante:Governu La Responsabiliza Sasan Lakon Iha Zona Estasionamentu
“Operasaun ne’e rutina no motorista sira ne’e ita halo apreensaun ba dokumentu, hodi aplika koima $45 ba selu iha banku, hafoin foti fali dokumentu,” Komandante Polísia Tránzitu munisípiu Dili, Inspetór, Domingos Sarmento Gama, hateten ba jornalista-sira durante operasaun iha área Loja Jacinto, Audian, tersa ne’e.
Husu ba motorista-sira atu kolobora ho funsionáriu estasionamentu hosi munisípiu Dili, bainhira orienta atu para tuir fatin estasionamenu tenke obedese tuir marka ne’ebé iha.
Objetivu hosi kolokasaun funsionáriu estasionamentu ne’e atu ajuda fó orientasaun ba parazen, nune’e evita engrafamentu.
Iha fatin hanesan, funsionáriu estasionamentu iha área Jacinto, Audian, Felicia dos Santos, hateten estasionamentu iha fatin ne’e funsiona hahú 2017 to’o agora, hodi halo kobransa ba motorista-sira ne’ebé para motór no karreta iha loron segunda to’o sesta.
Durante hala’o serbisu iha terrenu dalabarak kondutór-sira utiliza parázen iha liña markasaun no maioria la kumpre.
Jornalista: Nelson de Sousa
Editór: Cipriano Colo
