DILI, 25 agostu 2021 (TATOLI)-Jestór Klínika Bairru-Pité, Inácio dos Santos, kinta ne’e, submete relatóriu teste tirajen Tuberkulozu (TB) nian ba Gabinete de Apoiu Sociedade Civíl (GASC).
Notísia Relevante : GASC apoia $25.793 ba planu mestre klínika foun Bairro Pité
Klínika Bairru-Pité submete relatóriu ne’e ba GASC tanba antes ne’e GASC apoiu ona fundu $243,660.00 hosi tinan-fiskál 2020 to’o 2021 hodi apoiu programa Governu ba atendimentu saúde publika komunidade nian.
“Hosi orsamentu $243,660.00 ne’e ita ezekuta ba teste tirajen Tuberkulozu no HIV-SIDA hamutuk $20,400 nune’e ami hato’o relatóriu kona-ba atividade teste tirajen nian ba GASC,” Jestór Klínika Bairru-Pité, Inácio dos Santos hateten liuhosi komunikadu imprensa ne’ebé Agência Tatoli asesu, kuarta ne’e.
Nia hatutan, teste tirajen ne’ebé durante sira hala’o mak ba Aldeia Timor Kmanek, Suku Bairru-Pité, Postu Administrativu Don Aleixo, Munisípiu Dili, involve médiku na’in-rua (2) ba programa Tuberkulozu, enfermeira na’in-haat (4), pesoál saúde hamutuk ema na’in-lima (5) no voluntáriu na’in-rua (2) hosi Klibur Hadomi Siénsia.
“Bazeia ba identifikasaun teste tirajen ne’e ami-nia ekipa identifika suspeitu na’in-rua mak Tuberkulozu hosi totál populasaun teste tirajen na’in-270, no suspeitu na’in rua ne’e mai ona klínika hodi hasai sira-nia kabeen-tasak no ida mak presiza hasai raiu-X no teste polymerase chain reaction (PCR) iha Hospital Nasional Guido Valadares,” nia informa.
Daudaun ne’e iha loron sábadu ho domingu, ekipa saúde kontinua tun ba komunidade hala’o teste tirajen ba komunidade, nune’e hodi hasa’e taxa partisipasaun komunidade nian, no planu teste tirajen ne’e sei remata iha abríl 2022.
Koordenadór GASC, Filipe da Costa hateten, orsamentu $20,400 ba teste tirajen liuhosi atividade uma-ba-uma nune’e importante tebes tanba liuhosi atividade ne’e mak bele halo eliminasaun moras Tuberkulozu no atividade ne’e di’ak tanba bele suspeitu ba TB nian.
Governu no sosiedade sivíl kontinua servisu hamutuk ho Ministériu Saúde nune’e hodi elimina moras kontajiozu ne’e, tanba ne’e husu ba komunidade Suku Bairru-Pité hodi kolabora ho ofisiál saúde hosi Klínika Bairru-Pité hodi aselera atividade teste tirajen ne’e ho di’ak.
Jornalista : Arminda Fonseca
Editór : Francisco Simões
