BOBONARO, 29 agostu 2021 (TATOLI)-Klube Madiran FC sai kampeaun iha jogu sub 22, epoka 2021, hafoin halakon Monumentu FC ho rezultadu 3:1, ne’ebé hala’o iha Estádiu Malibaca Yamato, Maliana, domingu ne’e.
Iha inísiu jogu, Madiran FC hahú lansa ataka iha liña direita liuhosi avansadu Vladimiro Santos (11), halo defeza Monumentu atrapalla ho ninia téknika, tanba nia iha ambisaun atu prodús golu maibé la konsege atinje nia alvu no nia deside fó fali oportunidade ba nia kolega Duarte dos Santos (4) konsege fura uluk rede adversáriu iha minutu 1,16 hodi muda rezultadu ba 1:0.
Liu de’it minutu 7 avansadu Vladimiro Santos (11) fura tan golu ida hodi dudu rezultadu ba 2:0 mantein to’o árbitru termina jogu primeiru faze.
Ho rezultadu ne’e, halo ekipa rua ne’e halo kontra-atake maka’as liután no jogu modelu ofensivu hotu. Madiran FC ataka iha liña oin no Monumentu FC ataka iha liña direita konsege fó uluk presaun maibé la akontese golu ruma, tanba defeza Madiran FC forma metin iha liu.
Hakur ba segunda faze, jogadór sira klube rua ne’e nafatin foku iha joga kontra atake ho ambisaun atu prodús golu, maibé oportunidade monu fali ba Monumentu FC, liuhosi jogadór Valenti Saores (15) responde golu ida hodi muda rezultadu ba 2:1.
Rezultadu ne’e halo situasaun kampu manas liután, tanba adeptu Monumentu FC haklalak hodi fó suporta ba sira-nia jogadór sira atu kontinua joga no prodús golu, maibé la konsege no ikus oportunidade osan mean manu tan datolu ba Madiran FC, liuhosi jogadór avansadu Vladimiro Santo (11) fura tan golu ida iha minutu 85 ,ho aumenta sira nia rezultadu ba 3:1,skor refere mantein to’o árbitru deside hakotu jogu iha minutu 90.
Vitoria ba Madiran FC sai kampeaun no Monumentu FC sai segundu lugar, enkuantu terseiru lugar okupa hosi Maliana United.
Treinadór Madiran FC, Pedro Vicente, sente kontenti tanba ninia ekipa bele marka istória foun ba jogu sub-22 iha Munisipiu Bobonaro.
“Hanesan treinadór ha’u sente orgullu, tanba ha’u nia jogadór sira dezde inísiu jogu esforsu no nunka hetan derrota to’o faze final sai kampiaun,” Pedro Vicente hateten.
Treinadór Monumentu FC, Joel Amaral, espresa nia sentimentu kontente mós maske rezultadu derrota, maibé ida ne’e sei la hamate sira-nia vontade atu kompete fali iha tinan oin.
“Ami kontente ho rezultadu ne’e maske mai hosi postu administrativu Atabae, kompete iha Maliana, konsege halakon klube 20. Ida-ne’e hatudu katak ami mós bele sai kampeaun maibé dalaruma oportunidade mai ami mak seidauk to’o,” nia hateten.
Lala’ok jogu ne’e asiste diretamente hosi autoridade munisipál Bobonaro, reprezenta sekretáriu autoridade munisipál Julio Caero, prezidente Asosisaun Futebol Bobonaro ,Domingos Goveia, no adeptu hosi klube rua, no komunidade Maliana.
Jogu ne’e mós hetan seguransa másimu hosi F-FDTL, BOP, COE no Task Force Maliana no hetan mós apoiu emerjénsia hosi Médiku sira Hospital Referral Maliana no Cruz Vermella Timor-Leste (CVTL).
Kompetisaun jogu sub-22 epoka 2021, klube 22 mak kompete, hosi klube hira ne’e jogadór Loe-Laco FC, Samuel dos Reis mak sai mellor markadór ho golu 14, Artur Soares, avansadu Maliana United sai mellor jogadór no Natanael da Conseieção Soares hosi Klube Monumentu FC mak sai mellor ekipa.
Prémiu jogu-ne’e, vensedór hetan Tasa ho osan $400, segundu lugar hetan Tasa ho osan $300 no terseiru lugar $200.
Mellor markadór hetan $50, mellor jogadór $50 no mellor ekipa mós $50. Fundus sira-ne’e Asosiasaun Futeból Bobonaro (AFB) hetan apoia hosi SEJD no Federasaun Futeból Timor-Leste (FFTL).
Jornalista : Sérgio da Cruz
Editor : Francisco Simões
