DILI, 31 agostu 2021 (TATOLI)—Vise-Xefe Bankada Kmanek Haburas Unidade Nacional Timor Oan (KHUNTO), Deputadu António Verdiál de Sousa, husu Ministériu Saúde (MS) tenke trata ema mate ho COVID-19 ho umanidade.
Notísia Relevante: COVID-19, óbitu rua no ativu 4.574
“Ha’u husu Governu tenke trata ema mate ho COVID-19 ho umanidade,” António Verdiál levanta liuhosi plenária, tersa ne’e.
Iha loron segunda ne’e, António Verdiál de Sousa partisipa serimónia haloot mate-isin ema mate ho COVID-19, Íria Berta dos Santos (Vise-Primeiru-Ministru, Armanda Berta dos Santos nia inana), iha Lahane tanba Ministériu Saúde la trata ho didi’ak.
“Ha’u-nia laran susar tebes tanba foti mate-isin tau iha kaixaun laran. Ha’u-nia laran susar tanba Ministériu Saúde la trata asuntu sira-ne’e hodi dignifika matebian. Kaixaun ne’e mai hatuur de’it iha rai depois ba hatama kadaver ne’e depois hatama kaixaun iha rai-leten de’it,” nia kestiona.
Nia husu Komisaun F ne’ebé trata asuntu Saúde atu halo fiskalizasaun ba fatin izolamentu sira, nune’e identifika situasaun loloos ne’ebé mosu ba ema sira-ne’ebé mate ho COVID-19.
“La signifika katak bankada Governu, labele ko’alia buat-ne’ebé ita halo laloos,” nia afirma.
Hatán ba preokupasaun ne’e, Prezidente Parlamentu Nasionál, Deputadu Aniceto Longuinhos Guterres Lopes, husu tékniku sira anota hodi rekomenda kestaun hirak-ne’e ba Governu.
Jornalista : Evaristo Soares Martins
Editór : Cancio Ximenes
