DILI, 02 setembru 2021 (TATOLI)—Serbisu Imigrasaun ho Serbisu Investigasaun Kriminál Nasionál (SIKN), hahú loke investigasaun ba sidadaun na’in 42 ne’ebé antes ne’e hetan deportasaun hosi Autoridade seguransa Indonézia, tanba hakat ilegál hosi fronteira terrestre.
Insituisaun rua ne’e loke prosesu investigasaun kriminál ba sidadaun hirak-ne’e, tanba kumpre ona kuarentena, ne’ebé sei submete ba prosesu administrativu.
Notísia relevante:Autoridade seguransa Indonézia deporta Timoroan 113 mai TL
“Tanba ne’e atu aselera prosesu ho lalais maka ohin ita fahe sira na’in 21 ba iha SIKN no na’in 21 iha Serbisu Imigrasaun, hodi hahú loké prosesu investigasaun,” Xefe Operasaun, Serbisu Imigrasaun, Inspetór, Luis do Carmo Perreira, hateten ba jornalista-sira iha kna’ar fatin Dili, kinta ne’e.
Bainhira konklui investigasaun, Serbisu Imigrasaun sei aplika multa ba kada ema no investigasaun kriminál hosi polísia kontinua submete ba Ministéiru Públiku (MP), hodi aprezenta ba Tribunál loke prosesu legál tuir mai, tanba prátika krime dezobediénsia.
Bazea ba lei imigrasaun no tuir dekretu Governu númeru 19/2021,1 jullu kona-bá medida ezekusaun deklarasaun Estadu Emerjénsia efetua hodi dekretu Prezidente Repúblika númeru 39/2021, juñu ne’e iha artigu 7, obrigatóriu kontrola sanitária, iha Alinea 4 hateten indivídiu ne’ebé tama sai territóriu nasionál ho tuir dalan ilegál sei heta koima ho valór mínimu $30 no másimu $250, maibé tenke kumpre uluk kuarentena durante loron 14,hafoin investiga no aplika multa.
Tuir dadus iha sidadaun hamutuk 703 mak antes ne’e hetan deportasaun hosi autoridade seguransa Indonézia mai Timor-Leste, ne’ebé ba Atambua tuir ezame arte marsiál ho dalan ilegál.
Hosi númeru deportasaun ne’e balun estudante, joven, funsionáriu públiku inklui veteranu na’in-ida ne’ebé daudaun balun kumpre hela kuarantena iha Gleno, Maliana, Dili ho Baucau no na’in 42 mak kinta ne’e hahú loke prosesu investigasaun.
Jornalista: Nelson de Sousa
Editór: Cipriano Colo
