DILI, 06 setembru 2021 (TATOLI)—Durante fulan agostu sala emerjénsia Hospitál Nasionál Guido Valadares (HNGV) rejista ema mate hamutuk na’in 19 ne’ebé maioria sofre moras fuan, iis boot, problema pulmaun, rins no balun trauma.
“Sira ne’ebé to’o mai mate liu iha feto na’in-ida no mane na’in-rua no mós sira ne’ebé mai tiha depois la kleur mate ne’e iha feto na’in-ualu no mane na’in-ualu,” Diretór Klíniku HNGV, Marcelino Correia, hateten ba jornalista-sira, segunda ne’e.
Notísia relevante:Durante semana ida, ema na’in 18 mate ho COVID-19
Durante fulan agostu ne’e mós sala triajen emerjénsia rejista pasiente hamutuk 2.779 kompostu hosi feto 1.207 no mane 1.572 ne’ebé balun ho asidente tráfiku, balun violénsia doméstika, violénsia fízika sosiál.
Alende ne’e, médiku-sira mós detekta kazu pozitivu COVID-19 iha sala emerjénsia hamutuk 145 kompostu hosi feto 72 no mane 73.
Jornalista: Felicidade Ximenes
Editór: Cipriano Colo
