MJ reabilita balkaun atendimentu iha serbisu notariadu

DILI, 10 setembru 2021 (TATOLI)—Ministériu Justisa (MJ), liu hosi Diresaun Jerál Rejistu Notariadu, halo reabilitasaun ba balkaun ka fatin atendimentu públiku iha Colmera.
Realibitasaun ne’e loke tan espasu atendimentu ba fatin aula lima, hanesan balkaun ba notáriu, billete identidade, rejistu kriminál, sertidaun nasionalidade, balkaun sentrál ho passaporte, ne’ebé loke tan barranda ho fasilidade kadeira, nune’e kliente-sira bele tuur.
Notísia relevante:Kliente-sira husu serbisu notariadu hadi’a mekanizmu atendimentu
“Ita hakarak atende kliente sira di’ak liu-tán. Ema mai labele forma no labele hadau-malu no kliente-sira mai iha tuur fatin di’ak no aseguru,” Diretór Jerál Serbisu Rejistu Notariadu, Crisogno da Costa Neto, hateten ba jornalista Agência Tatoli, sesta ne’e.
Crisogno da Costa Neto rekoñese katak, dalabarak ona bainhira kliente-sira barak mak mai trata dokumentu, hamrik de’it inklui forma liña naruk, balun tenke hamriik kleur iha loron-manas ne’ebé la dignu no seguru.
Obra ne’e implementa hosi kompañia lokál Mota Masin, durante fulan tolu hahú hosi agostu to’o outubru tinan-ne’e ho nia orsamentu rihun $70.
Tuir dadus, trimestre daruak hosi janeiru to’o juñu tinan ne’e, diresaun ne’e rekolla reseita $199.000 hosi serbisu emisaun passaporte, ne’ebé iha ema 3.192 maka trata pasaporte komún, serbisu diplomátiku no estranjeiru.
Alende ne’e, atende mós serbisu públiku-sira ba sidadaun-sira hanesan emite billete identidade ba ema ne’ebé trata hamutuk 19.986 , rejistu kriminál iha ema 8.955, rekizasaun sertifikadu rejistu kriminál 2.388 no resivu boletin rejistu kriminál 1.322.
Jornalista: Nelson de Sousa
Editór: Cipriano Colo

