DILI, 14 setembru 2021 (TATOLI)–Komisaun B ne’ebé trata asuntu Negósiu Estranjeiru, Defeza no Seguransa, husu órgaun soberania sira halo konsensu nasionál molok aplika militarizasaun iha fronteira entre Timor-Leste ho Repúblika Indonézia.
Prezidente Komisaun B, Deputadu José Agostinho Siqueira ‘Somotxo’ esplika, asuntu rua ne’ebé presiza halo análize kle’an mak krime organizadu ne’ebé kontinua buras iha fronteira no militarizasaun.
“Se ita iha ona kondisaun atubele kumpre militarizasaun, ha’u hanoin ita bele. Maibé dezde uluk kedas ha’u dehan tenke halo konsensu nasionál tanba polísia iha-ne’ebá mós liuhosi polítika konsensu nasionál. Tán ne‘e mak órgaun soberania sira sei halo desizaun tanba seguransa defeza externa ne’e iha Konstituisaun RDTL entre ba forsa armada, la’ós forsa seguransa interna,” Prezidente Komisaun B ne’e informa jornalista sira iha uma fukun, tersa ne’e.
Bainhira Governu sente iha ona kondisaun entaun molok halo tranzisaun tenke iha konsensu nune’e evita konfrontu polítiku no laiha nesesidade atu kondena malu iha futuru.
Tanba, estadu ida-ne’e iha órgaun soberania haat kompostu hosi Prezidente Repúblika, Parlamentu Nasionál, Governu no Tribunál Rekursu.
Nia subliña, kuandu laiha konsensu ba asuntu ne’e entaun ba futuru ema balu bele polítika situasaun ne’e.
Prezidente Komisaun B ko’alia asuntu ne’e tanba Primeiru-Ministru Taur Matan Ruak, fó-sai iha plenária katak sei destaka forsa armada iha fronteira.
Tuir Konstituisaun RDTL, Parte V (Defeza no Seguransa Nasaun nian), artigu 146 (Forsa Armada sira), númeru 2 hateten FALINTIL-FDTL garante independénsia nasionál, integridade territoriál, Liberdade no populasaun nia seguransa hasoru agresaun ruma ka ameasa externa, ho respeitu ba orden konstitusionál.
Purtantu artigu 147 (Polísia no forsa seguransa sira) númeru 1 esplika, Polísia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku.
Jornalista : Evaristo Soares Martins
Editór : Cancio Ximenes
