BOBONARO, 15 setembru 2021 (TATOLI)—Diresaun Transporte Terrestre (DTT), munisípiu Bobonaro, kontinua halo monitorizasaun ba kustu tarifa transporte públiku hanesab bus diresaun Maliana ba kapitál Dili, sei mantein ho presu anteriór $6 kada viajen.
“Sei nafatin ho tarifa anteriór, tanba seidauk iha alterasaun kona-bá atu halo mudansa ruma. Ita sei halo kontrolu atu motorista sira labele hasa’e tarifa tuir sira-nia hakarak,” Diretór DTT, munisípiu Bobonaro, José Paulo Henriques Baptista, hateten ba jornalista iha Maliana, kuarta ne’e.
Notísia relevante:Jullu-agostu, Tránzitu Bobonaro rekolla $2.017
DTT Bobonaro konsidera transporte públiku liu-liu bus sira iha direitu tomak atu hahú halo sirkulasaun ba Dili, maibé husu ba motorista no pasajeiru-sira tenke kumpre protokolu saúde.
“Bainhira sira la kumpre regra hirak-ne’e, ita sei fó sansaun aplika lei infrasaun kona-bá dezobediénsia ba órden no regra ne’ebé iha,” nia subliña.
Motorista, António da Cruz haktuir, durante loron tolu ona hahú halo operasaun, maibé la hetan rendimentu tanba situasaun COVID-19, ema la halo movimentu.
Tuir dadus hosi Diresaun Transporte Terrestre, munisipiu Bobonaro, hosi 2020 to’o agora transporte auto-carro bus Maliana hamutuk 32, hosi númeru ne’e 28 mak sei ativu halo rute ba-mai Dili-Maliana.
Jornalista: Sèrgio da Cruz
Editór: Cipriano Colo
