DILI, 16 setembru 2021 (TATOLI) – Prezidente Federasaun Futeból Timor – Leste (FFTL), Francisco Martins da Costa Jerónimo, klarifika katak FFTL mantein pozisaun bainhira Liga Futeból Timor -Leste (LFTL) la submete kontratu servisu funsionáriu sira-nian no relatóriu servisu durante ne’e.
Notísia Relevante : Laiha “lójika” FFTL husu LFTL submete kontratu-relatóriu
“Osan ne’ebé Governu atribui mai FFTL ne’e ba atividade fulan hitu (7) de’it, la’ós tinan tomak, hahú hosi juñu to’o dezembru. Ko’alia kona-ba funsionáriu sira servisu ne’e FFTL transfere osan ne’e la’ós ba konta liga nian, maibé transfere diretamente ba funsionáriu sira nia konta, entaun kontratu funsionáriu sira-nian tenke manda mai FFTL. Ema servisu laiha kontratu no baze ba saida maka atu selu,” Francisco Martins da Costa Jerónimo ba Agência Tatoli iha resintu FFTL, Dili, kinta ne’e.
Nia husu ba LFTL se komprende didi’ak karik, halo kontratu ho funsionáriu sira tenke iha kontratu ida klaru, tenke sita osan ba funsionáriu sira kada fulan hira no hira mak selu tasa ba Estadu no seluk tan tenke iha.
“Kontratu iha mak ita bele selu ema, se kontratu laiha ami atu selu oinsá. Ami mós hein hela bainhira mak sira haruka kontratu ne’e mai para halo pagamentu tuir kontratu ho Governu la’ós tuir fali sira nia hakarak,” Francisco afirma tan.
Nia esklarese tan, Governu fó osan ne’e mai fulan hitu (7) nian, ida-ne’e mak atu selu. Se liga mantein sira nia pozisaun signifika sira mak lakohi simu osan ne’e.
Kona-ba orsamentu operasionál ba LFTL tenke submete proposta kona-ba osan hira mak presiza no saida mak atu halo.
“Osan ba operasionál nian hira? Saida mak atu halo presiza halo relatóriu mai durante ne’e halo saida para ita hatene hodi selu. Ha’u hanoin buat ida-ne’e la’ós regra foun ida. Se ita dehan fali ida-ne’e laiha lójika, ne’e oinsá,” Francisco Jerónimo tenik.
Jornalista : Hrotencio Sanchez
Editór : Francisco Simões
