BOBONARO, 17 setembru 2021 (TATOLI)—Sentru Joventude Munisípiu Bobonaro (CJMB sigla portugués), simu ona proposta 80 hosi grupu Joventude iha postu administrativu neen, hodi halo atvidade estímulu emprendorizmu sosiál atu dezenvolve kreatividade.
“Proposta ne’e ita simu hosi grupu joventude suku 50. Sira submete atividade emprendorizmu sosiál hamutuk 80,” Diretór CJMB, Alcino Lopez, informa ba jornalista iha knaar fatin, sesta ne’e.
Notísia relevante:Sentru joventude Viqueque simu ona proposta hosi Grupu 40
Grupu joventude ne’ebé submete ona prposta, iha postu administrativu Atabae iha ualu, Balibo hitu, Loloto’e ualu, Cailaco 12, Bobonaro 16 no Maliana 21.
Tuir tarjetu hosi CJMB, tinan ne’e simu de’it proposta 60, maibé SEJD orienta fali tenke simu másimu 120, ho ida-ne’e to’o ohin loron seidauk atinje alvu, tanba ne’e ba oin sei kontinua esforsu pasa informasaun liuhosi autoridade lokál-sira, no publika iha média sosiál hodi fó oportunidade ba grupu joventude atu submete tan proposta.
Bainhira atinje ona, CJMB sei tun ba halo asesmentu iha sira nia fatin, hodi halo avaliasaun ba proposta, ekipa mai hosi autoridade munisípiu, CJMB, MAP no MPCI no Parlamentu Foin Sa’e, rezultadu ikus mak hateten loloos grupu ne’ebé posibilidade atu hetan apoiu.
Ekipa ida sei halo monitorizasaun ba iha sira nia fatin, kona-ba sira nia atinjimentu progresu servisu, bainhira hetan ona apoiu, maibé monitorizasaun ne’e mak identifika grupu balun ne’ebé la utiliza ne’e tuir akordu, sei aplika sansaun no sei hato’o keixa ba PDHJ tanba fundu ne’e maihosi orsamentu Estadu.
Proposta hirak ne’ebé joven-sira submete, barak liu mai hosi setór pekuária hanesan haki’ak manu, karau, bibi no fahi, setór peska mak haki’ak ikan iha mós oltikultura.
Atu finansia programa estímulu emprendorizmu sosiál, CJMB prepara ona orsamentu $60.000, ba jestór programa nia viajen lokál hetan $5.140.
Totál orsamentu ne’ebé Sekretáriu Estadu Joventude no Desportu prevee, hamutuk $65.140.
Jornalista: Sérgio da Cruz
Editór: Cipriano Colo
