Polísia kontinua buka-tuir autór soe bebé iha Delta

DILI, 17 setembru 2021 (TATOLI)—Polísia Nasionál Timor-Leste (PNTL), kontinua buka-tuir autór ne’ebé soe bebé feto ida ho kondisaun mate iha lixu-fatin, área Delta 2, iha 16 setembru.
“Polísia dadaun sei buka-tuir, hein tempu badak bele identifika hodi prosesa tuir lei ne’ebé vigora,” Portavós Komandu Jerál PNTL, Superintendente Xefe, Arnaldo Araújo, hateten ba jornalista-sira iha Komandu Jerál PNTL, Caicoli, sesta ne’e.
Notísia relevante:PNTL detein membru Grupu Arte Marsiál 117 iha Manleuana
Polísia mós koordena ona ho parte Polísia Forénsika hodi rekolla ona evidénsia no lori ona mate-isin ba iha Ospitál Nasionál Guido Valedares (HNGV) hodi submete ba autópsia.
Komandu munisípiu Dili, lansa ona serbisu intelijénsia, hodi buka-tuir autór no sei haree kamera CCTV ne’ebé iha, atu bele fasilita di’ak liu tán.
Iha 16 setembru tuku 06:00, pesoál saneamentu Dili, bainhira ba foti lixu iha área Delta 2, hetan bebé ida ho kondisaun mate falun hela iha plástiku ne’ebé soe hosi ema deskoñesidu.
Jornalista: Nelson de Sousa
Editór: Cipriano Colo

