DILI, 17 setembru 2021 (TATOLI) – Universidade Nasionál Timor-Lorosa’e (UNTL) deside ona kalendáriu graduasaun ba estudante finalista na’in-349 hala’o iha tersa (21/09/2021).
Vise-Reitór ba Asuntu Akadémiku no Garantia Kualidade, Samuel Venâncio de Sousa Freitas, sesta ne’e, hateten graduasaun ne’e sei realiza iha Hera ba estudante finalista 349 hosi fakuldade neen (6).
“Se iha mudansa derrepente, ita sei aviza fila fali karik laiha mudansa, ami sei hala’o geladi iha segunda feira,” Samuel de Sousa, hateten ba jornalista iha kampus UNTL, Caicoili, Dili, sesta ne’e.
Nia esplika graduasaun ne’e prioridade UNTL bainhira Mistériu Ensinu Superiór deside loke fali atividade aula prejensiál iha instituisaun ensinu superiór sira, UNTL deside kedan loron atu hala’o graduasaun ba estudante sira.
Universidade deside gradua iha tersa ne’e atu fó oportunidade ba graduadu sira bele halo geladi. tanba atividade seluk universidade realiza ona iha fulan kotuk, agora hein atu realiza de’it programa graduasaun.
Graduasaun ba graduadu 349 ne’e mai hosi fakuldade neen (6) mak hanesan Fakuldade Siénsia Sosiál, Fakuldade Ekonomia, Fakuldade Edukasaun Arte Umaniora (FEAH), Fakuldade Enjeñaria no Fakuldade Filozofia. Enkuantu, Fakuldade Direitu, Medisina no Siénsia Exacta, tinan ne’e, laiha graduasaun.
Jornalista : Tomé Amado
Editór : Francisco Simões
