BAUCAU, 20 setembru 2021 (TATOLI)–Anin boot iha loron domingu (19/09) sobu uma kakuluk komunidade Carlos da Costa Belo, iha aldeia Lutumutu, suku Tirilolo, postu Baucau villa.
Vítima dezastre naturál, Carlos, konta tuir, anin ho velosidade maka’as pur volta tuku 15:00 loraik, la to’o minutu rua akontese, sobu kedas uma nia kakutak, kalen no besi ne’ebé prega hodi lori semo tomak pur volta metru 12 hosi uma.
“Ami haree nakdulas iha estrada, derepente hú kona uma, sobu kalen hit ho besi dala-ida,” Carlos hateten iha fatin akontesimentu, planalto Villa nova, segunda ne’e.
Hosi akontesimentu ne’e, la rezulta membru família ruma kanek, maibé kalen parte varanda mak kuaze atu estraga hotu.
Ho akontesimentu ne’e, Carlos informa kedas ba líder komunitáriu Tirilolo hodi diretamente to’o iha fatin hodi rekolla informasaun no dadus estragu.
Iha fatin ketak, Diretór servisu munisipál protesaun sivil no dezastre naturál, Nelson Nunes, hateten, hafoin simu informasaun hosi autoridade suku, nia parte ohin orienta ona ekipa atu ba rekolla dadus, liuliu sasán ne’ebé hetan estragu hosi akontesementu ne’e.
“Hafoin levantamentu dadus no asesmentu, ami sei fó apoia emerjénsia ba vítima dezastre naturál ne’e,” Nelson hateten iha Sentru Konvensaun Baucau (CCB,sigla Portugés).
Nune’e, Diretór servisu munisipál ne’e husu atu komunidade sira prevena-an molok akontese dezastre naturál, hanesan akompaña informasaun previzaun tempu hosi meteorolojia.
“Meiu prevensaun mak asegura uluk uma ne’ebé karik la seguru, hases-an hosi ai-hun boot, nune’e tohar karik labele rezulta vítima. Husu ba komunidade atu prevene-an, hadi’a uma kakuluk, karik pregu mamar tenki prega metin fali, importante tau atensaun mós ba oan sira,” Nelson apela.
Antes ne’e, Sekretaria Estadu Protesaun Sivil (SEPS) informa Timor-Leste hetan alerta hosi Meteorolojia Austrália katak iha posibilidade sei akontese fenómenu La Niña udan, ho anin intensidade boot iha fulan-outubru to’o tinan oin, ne’ebé ho kondisaun ne’e, Timor-Leste mós udan sei tun sedu, la hanesan ho klima iha tinan kotuk.
Jornalista : Natalino Belo
Editora : Julia Chatarina
