DILI, 21 setembru 2021 (TATOLI)–Reprezentante Povu iha uma fukun Parlamentu Nasionál husu Komisaun Antí Korrupsaun (CAC-sigla portugés) loke investigasaun ba Fundu COVID-19 tanba funsionáriu balun mate no la serbisu ona maibé naran tama nafatin atu simu subsídiu liña frente.
Notísia Relevante: PN husu Governu aselera pagamentu ba ekipa liña frente
Deputada Bankada CNRT, Virgínia Ana Belo husu ba Komisaun Funsaun Públika (CFP-sigla portugés) atu tau atensaun ba funsionáriu públiku iha ministériu sira-ne’ebé halo ezekusaun ba fundu COVID-19.
“Ha’u fó ezemplu iha HNGV nian funsionáriu sira-ne’ebé balun mate tiha ona, balun la serbisu tiha ona, maibé sira-nia naran kontinua tama hodi simu subsídiu liña frente nian. Tanba ne’e mak husu CFP akompaña no Komisaun Antí Korrupsaun mós bele haree ida-ne’e,” Deputada Virgínia Ana Belo levanta liuhosi plenária, tersa ne’e.
Notísia Relevante: MF husu liña ministériu submete lista liña frente
Nune’e mós Deputadu Leandro Lobato husu Governu se osan iha duni ona entaun tenke halo pagamentu ba liña frente sira tuir lei ne’ebé parlamentu aprova ona duke pendent beibeik.
Deputada Maria Fernanda Lay preokupa ho ezekusaun fundu COVID-19 tanba to’o oras ne’e seidauk prosesa pagamentu.
“Governu dehan tempu badak, sé tempu badak ne’e bainhira, hanesan ita lohi de’it ema. Ida-ne’e realidade ida,” nia kestiona.
Notísia Relevante: Ezekusaun reál fundu COVID-19 atinje millaun $100 reprezenta 35%
Jornalista : Evaristo Soares Martins
Editór : Cancio Ximenes
