DILI, 21 setembru 2021 (TATOLI)—Governu Timor–Leste liuhosi Sekretáriu Estadu Protesaun Sivíl (SEPS), Joaquim Gusmão Martins, asina nota entendementu ho World Food Programme (WFP) atu ofisializa kooperasaun ne’ebé estabelese antes ona.
“Asina nota ohin ne’e ofisializa de’it tanba antes ne’e ita serbisu hamutuk ona. Foin lalais ita kona dezastre boot, WFP hanesan parseiru ne’ebé hamrik metin iha ita nia kotuk,” Joaquim Gusmão Martins, hateten ba Jornalista-sira iha otél Timor, Dili, tersa ne’e.
Notísia relevante:SEPS no parseiru hahú prepara kondisaun hasoru fenómenu La Niña
Governante ne’e esplika, bazeia ba metrolojia Austrália nian ne’ebé fó-sai ona katak, posibilidade sei akontese fenómeno la niña, hanesan anin no udan makás hahú outubru to’o tinan oin, tanba ne’e SEPS ho parte relevante-sira halo ona koordenasaun hodi haree ba situasaun ne’e.
Tanba ne’e, ho estabelesimentu kooperasaun ho WFP, sei kontinua fó liman ba malu iha kualkér situasaun, ne’ebé akontese iha futuru, liga mós ho asaun prevensaun dezastre.
Jornalista: Hortencio Sanchez
Editór: Cipriano Colo
