DILI, 23 setembru 2021 (TATOLI)-–Ministru Turizmu, Komérsiu no Indústria, José Lucas do Carmo da Silva, informa, ministériu implementadór hahú asina ona kontratu ho kompañia sira atu distribui Cesta Bázika ba reklamante iha fulan ne’e nia laran.
“Ami asina ona kontratu ho empreza sira atu distribui Cesta Bázika ba relakmante ka benefisiáriu hamutuk 25.000, iha semana ne’e,” Ministru José Lucas hateten ba Agência TATOLI, iha Palásiu Governu, kinta ne’e.
Bazeia ba lista hosi Ministériu Administrasaun Estatál (MAE), hatudu reklamante hamutuk 25.569 hosi uma-kain 5.651, ne’ebé kompostu hosi Dili hamutuk 19.000 no restu hosi munisípiu seluk.
“Ita-nia reklamante sira barak liu iha Dili, tuir fali iha Ermera, Ainaro no Aileu, ne’ebé ita kontrata kompañia atubele fahe ona Ceta bázika,” nia akresenta.
Notísia relevante: Governu esforsu atu atribui Cesta Bázika ba reklamante sira
Nune’e, progresu distribuisaun Cesta Bázika hosi entidade implementadór ba benefisiáriu sira atinje ona 96,5% ba populasaun 1.503.563 hosi suku 452, maibé suku rua no aldeia tolu mak sei pendente hela tanba komunidade iha diferensa ideia kona-ba kuantidade sasán.
Entidade implementadór sira hanesan MTKI ninia área distribuisaun iha suku hamutuk 118 ho benefisiáriu hamutuk 658.608, Ministériu Agrikultura no Peska (MAP) kobre iha suku 47 ho nia benefisiáriu hamutuk 106.782.
Sekretaria Estadu Kooperativa (SEKoop) kobre iha suku 183 ho benefisiáriu 438.055, Sentru Lojístika Nasionál (CLN, sigla portugés) kobre iha suku 86 ho benefisiáriu hamutuk 215.587, no Rejiaun Administrativa Espesiál Oé-cusse Ambeno (RAEOA) kobre iha suku 18 ho benefisiáriu hamutuk 84.243.
Jornalista : Florêncio Miranda Ximenes
Editora : Julia Chatarina
